Maıdangerler erligine arnalǵan kitap kórmesi ótti
ASTANA. KAZINFORM – Jeńis kúnine oraı Astanadaǵy Ulttyq akademııalyq kitaphanada «Uly Jeńiske taǵzym» atty kitap kórmesi uıymdastyryldy.
Kórme maıdangerler erligin ulyqtaýǵa, Uly Otan soǵysy týraly ádebıetterdi nasıhattaýǵa jáne jas urpaqty otanshyldyqqa baýlýǵa baǵyttaldy.
Mádenıet jáne aqparat mınıstrligi málimetinshe, ekspozıtsııada soǵys jyldaryndaǵy oqıǵalarǵa, qazaqstandyqtardyń maıdan men tyldaǵy erligine arnalǵan derekti, pýblıtsıstıkalyq jáne kórkem shyǵarmalar usynyldy. Olardyń qatarynda Málik Ǵabdýllın, Ǵabıt Músirepov, Qasym Qaısenov, Láıla Ahmetova, Bısen Jumaǵalıev jáne ózge de avtorlardyń eńbekteri bar.
Kórme aıasynda oqyrmandarǵa jaýyngerler erligi men Uly Jeńis tarıhyna arnalǵan ádebıetterge sholý jasaldy. Kópshilikke soǵys jyldaryndaǵy oqıǵalardy qamtıtyn ǵylymı eńbekter men Uly Otan soǵysyna qatysqan ǵalym-ardagerlerdiń estelikteri tanystyryldy.
Aıta keteıik, Bakýde «Study in Kazakhstan» halyqaralyq bilim berý kórmesi ótti.
