Maıdanger úıde daýys berý quqyǵynan bas tartyp, referendým ýchaskesine keldi

ÓSKEMEN. QazAqparat – Shyǵys Qazaqstan oblysynyń turǵyndary respýblıkalyq referendýmǵa belsendi qatysýda, dep habarlaıdy QazAqparat tilshisi.

Oblysta jalpy halyqtyq referendýmda daýys berý 1027 ýchaskede júrip jatyr. Densaýlyq jaǵdaıyna baılanysty emdelip jatqan nemese áskerı boryshyn atqaryp júrgen turǵyndar úshin kásiporyndar men medıtsınalyq mekemelerde 68 daýys berý orny ashylǵan.

Altaı aýdanynda daýys bergenderdiń qatarynda jalǵyz soǵys ardageri 95 jastaǵy Vasılıı Rýdometov te bar. Úıinen shyqpaı-aq daýys berý múmkindigine qaramastan ol referendým ýchaskesine ózi kelgen.

Daýys berip jatqandar arasynda áskerıler de az emes. Ulttyq ulan «Shyǵys» óńirlik qolbasshylyǵynyń sarbazdary ishinen saıası naýqanǵa alǵash ret qatysyp jatqandar kezdesedi.

«Bul meniń alǵash ret daýys berýim. Konstıtýtsııaǵa engiziledi dep josparlanyp otyrǵan ózgeristermen tanysyp shyǵyp, óz tańdaýymdy jasadym», - deıdi sarbaz Egor Nıkýlshın.

Esterińizge sala ketsek, osyǵan deıin Óskemen halqy óz tańdaýyn jasap jatqany jaıly fotoreportaj bergen edik.