«Maıdanger partızan» atty jańa týyndyǵa Rahmetolla Egizbaevtyń erlik joldary arqaý bolǵan (FOTO)
Ol Belarýs jerinde soǵysyp, partızan bolǵan. Jaryqqa shyǵyp otyrǵan «Maıdanger partızan» atty kitap osy Rahmetolla Egizbaevtyń erlik joldaryn baıandaıdy. Atalǵan kitaptyń tanystyrylymy Qazaqstan Respýblıkasynyń Ulttyq akademııalyq kitaphanasynda ótti.
Osy keshti júrgizgen aqyn Aýyt Muqıbek Otan qorǵaýshy kúni qarsańynda ótip otyrǵan sharanyń máni jaıly toqtala kelip, jas urpaqty tárbıeleýde mundaı kitaptyń mańyzy zor ekenin aıtty. Kitap avtory jýrnalıst Baıan Muhambetálıev týyndynyń qalaı jazylǵany jóninde áńgimelep berdi. Ertede jaý shapqan kezde qalalardy qıratyp, halyqty qyratyny belgili. Sonymen birge áýeli kitaphanalaryn órtep jiberetin bolǵan. Óıtkeni kitap - adam sanasyn qalyptastyratyn, ar-namysyn shyńdaıtyn, ulttyń qundylyqtaryn urpaqtan urpaqqa jetkizip otyratyn qazyna. «Sondyqtan da kitaptan nár alǵan adam eshqashan da qul bolmaıdy, rýhy jyǵylmaıdy»,- dedi jýrnalıst B. Muhambetálıev.
Jalpy, partızandar týraly jazylǵan Qasym Qaısenovtyń, Ádı Sháripovtyń týyndylary qazaq ádebıetinde erekshe oryn alady. Degenmen bul taqyryptaǵy shyǵarmalar áli az eken. Jańa kitap sol salaǵa úles qosyp otyrǵanyn aıta ketken jón.
Kitap avtory osy týyndysyn jazý barysynda arnaıy saparmen Belarýs Respýblıkasyna baryp, Ulttyq muraǵatynda bolyp, R.Egizbaev týraly derekterdi izdep, sarǵaıǵan qujattardyń qyr-syryna úńilgen. «Rahmetolla aǵa týraly jazylǵan qujattardy qolyma alǵanda, men ol kisimen tildeskendeı boldym»,- dedi óz sózinde B. Muhambetálıev.
Avtordyń aıtýynsha, Belarýs eliniń 100 paıyzy jaý tabanynyń astynda qalǵan, sol sebepti qasiretti kóp shekken turǵyndar «soǵysty umytqan kúni soǵys bastalýy múmkin» degen sózdi jıi aıtady eken.
Májilis depýtaty Shavhat Ótemisov avtordyń bul kitaby búgingi urpaqtyń Uly Otan soǵysynda ot keshken ákelerge kórsetken qurmeti ekenin aıtty. Batys Qazaqstan oblysynan 76 myńnan astam adam soǵysqa attanǵan, sonyń 36 myńy urys alańynda qaza tapqan. «Rahmetolla Egizbaev elge oralyp, óńirdiń áleýmettik-ekonomıkalyq jaǵdaıyn kóterý jolynda eńbek etti. Otbasyn quryp, zaıyby ekeýi on bala tárbıelep ósirdi. Onyń ómiri jastarǵa úlgi. Bul kitapty qarapaıym qazaq patrıotynyń ómir joly dep aıtýǵa da bolady. Óıtkeni Rahmetolla aǵa - soǵysta da, eńbekte de el úshin aıanbaǵan naǵyz patrıot»,- dedi Shavhat Ótemisov.
Kelesi kezekte Qazaqstan halqy Assambleıasy Tóraǵasynyń orynbasary, QR Prezıdenti Ákimshiliginiń Qazaqstan halqy Assambleıasy hatshylyǵynyń meńgerýshisi Eraly Toǵjanov, áskerı jýrnalıst Sádýaqas Jubatov, QazAqparat redaktory, jýrnalıst Saılaý Abylaev sóz sóılep, óz pikirlerin bildirdi. Rahmetolla Egizbaevtyń nemeresi Qadirbek Belarýs eline baryp kelgen sapary jóninde aıtyp ótti. Sondaı-aq atalǵan kitaphananyń bas dırektory Úmithan Muńalbaeva jańa týyndy kitaphana qoryna alynatynyn málimdedi. Mektep oqýshylary Otan, Uly Jeńis týraly óleńder oqydy.
Belgili ánshi Janat Shybyqbaev osy keshte Muqan Tólebaevtyń «Kesteli oramal» ánin shyrqady.
