«Maıdan joly» otrıady soǵysta qaza tapqan jaýyngerdiń týystaryn izdep jatyr

PAVLODAR. QazAqparat – «Maıdan joly» otrıady ІІ Dúnıejúzilik soǵysqa Pavlodar oblysynan shaqyrylǵan Máýken Nyǵmetovtiń týystaryn izdep jatyr, dep habarlaıdy QazAqparat tilshisi.

Maıdangerdiń súıegi Reseıdiń Lenıngrad oblysynan tabyldy.

«2019 jyldyń kókteminde Reseıdiń izdeýshi otrıadtary Lenıngrad oblysyndaǵy Sınıavın qyratynda izdeý ekspedıtsııasyn júrgizdi. Ekspedıtsııa barysynda Qyzyl armııa áskeriniń súıegi tabylǵan. Áskerdiń medalony bolǵan. Saraptama júrgizilgen soń áskerdiń aty-jóni anyqtaldy. Ol – Qazaqstannyń týmasy Nyǵmetov Máýken (Maıdan), 1919 jyly týǵan», - dep málimdedi «Maıdan joly» otrıadynyń komandıri Aleksandr Shıtov.

Onyń aıtýynsha, maıdanger Pavlodar oblysynyń qazirgi Aqsý qalasynyń aýmaǵynda (sol kezdegi Kaganovıch aýdany) ómir súrgen, 1942 jyly habar-osharsyz ketken. Qazir onyń týǵan-týysqandaryna izdeý salynǵan.

«Medalonnyń qosymshasynan mynalardy oqýǵa bolady: NIGMETOV M(aý)...n, sanıtar, 1915 j.t., týǵan jeri: Qazaq KSR, Pavlodar oblysy, Kaganovıch aýdany, Syntas s/s, aýyl № 6. Otbasy: Opergenova N. (nemese Opfgenova N.), Qazaq KSR, Pavlodar oblysy, Kaganovıch aýdany, Potanın keńshary, Potanınskaıa derevnıasy», - deıdi A. Shıtov.

Aqsý qalasynyń arhıv derekterinde mynadaı málimet bar: «Nygmetov Maıdan 1918 j.t., týǵan jeri Aınakól aýyly, qazaq, Ermakov AÁK 1941 j. shaqyrylǵan, qatardaǵy ásker, b/p, 29.09.1942 j. shaıqasta qaza tapqan. Jerlengen jeri: Lenıngrad obl., Mgınsk aýdany, Gaıtolovo p.».

Reseı Qorǵanys mınıstrliginiń Jınaqtalǵan derekter qorynda osyndaı jazba bar, biraq týǵan jyly basqasha – 1919 jyl kórsetilgen.

Avtory Anton Gagarın