Maıdan dalasynda qaza bolǵan aqmolalyq jaýyngerdiń týystary izdestirilýde
KÓKShETAÝ. QazAqparat - Maıdan dalasynda qaza bolǵan aqmolalyq jaýynger Tolsybaı Jumabekovtiń týystary izdestirilýde. Bul týraly top jetekshisi Mıhaıl Bogdanovtyń áleýmettik jelidegi paraqshasynda jarııalandy, dep habarlaıdy QazAqparat tilshisi.
«Bizdiń sarapshylar besinshi medalondaǵy jazbany oqydy. Jazbada bul jaýyngerdiń de Qazaqstannan ekenine kóz jetkizýge bolady. Ol 1909 jylǵy Tolsybaı Jumabekov. Aqmola oblysynyń Qorǵaljyn aýdany Sulagúl ayldyq okrýginiń Ekpindi atyndaǵy ujymshardyń týmasy», - deıdi Mıhaıl Bogdanov jelidegi jazbasynda.
Onyń aıtýynsha, Tolsybaı Jumabekov súıegi de osyǵan deıin anyqtalǵan aqmolalyq jaýynger Kámen Jumanovtyń súıeginiń qasynan tabylyp otyr.
«Bir qyzyǵy, Jumanov pen Jumabekovtyń súıekteri bir shuńqyrda bolǵan. Olardyń medalondary bir qolmen jazylǵan jáne ekeýiniń de artqy jaǵy birdeı, kórsetilgen kúni 21.2.42 jyl. Shamasy, bul áskerge shaqyrǵan kúni. Olar bir aýdannan, jerlester. Áskerge bir kúni shaqyrylǵan, birge qaıtys boldy jáne osy ýaqyt ishinde @konoplevich tapqansha bir shuńqyrda jatty. Mine, osyndaı oqıǵa, eki dos, eki joldas Qazaqstannan. Ádettegideı, qazaq áriptesterimizden jaýyngerlerdiń týystaryn izdeýge kómek suraımyz», - delingen jazbada.
Aıta ketsek, osyǵan deıin Reseıdiń Tver oblysy aýmaǵynda úsh qazaqstandyq jaýyngerdiń súıegi tabylǵan bolatyn.
