Maıamıde «Dúnıejúzi arýy-2014» qatysýshylary qazaqsha saırap júr (FOTO, VIDEO)
Dástúr boıynsha, «Dúnıejúzi arýy-2014» baıqaýynyń fınalyna úsh apta qalǵanda álemniń túkpir-túkpirinen kelgen tıtýldy sulýlardyń bastary birigedi. Qazir arýlar qyzý daıyndyq ústinde. Qaıyrymdylyq jobalarǵa, fotosessııalarǵa, eń úzdik ulttyq kostıým baıqaýyna qatysyp jatyr. Baıqaýdy umytyp, qyzdar dostasyp ta ketken tárizdi. Olar daıyndyqtyń arasynda óz memleketiniń mádenıetin, tarıhyn, dástúrin túsindirip, áńgimege den qoıady.
Bizdiń otandasymyz aınalasyndaǵy ózge memleketterden kelgen qatysýshylardy tipti qazaqsha bir-eki sóz úıretip, qazaq tiliniń sabaqtaryn óziniń áleýmettik jelisindegi paraqshaǵa salyp turady.
«Qazaqstan, sen myqtysyń!», - deıdi bir beınerolıginde ulttyq baıqaýdan jeńimpaz bolyp kelgen ózge eldiń ókili. «Qazaqstan, qalaısyń?», - dep saýal tastaıdy kermaraldaı syzylǵan «Argentına arýy».
Aıta ketý kerek, Aıdaı baıqaýdan tys sharalarǵa óte belsendi qatysyp júr. Keshterdiń birinde ol dı-djeı boldy. Tipti jergilikti polıtsııanyń quramynda jumys atqaryp ta kórdi.
Esterińizge sala keteıik, «Shymkent arýy-2008», «Almaty vıtse-arýy-2013» jáne «Qazaqstan arýy-2013» ataqtaryna ıe Aıdaı Isaeva 25 qańtarda Maıamıde (AQSh) ótetin eń bedeldi sulýlyq baıqaýlarynyń biri «Dúnıejúzi arýy-2014» dodasyna Qazaqstannyń atynan qatysady.
«QazAqparat» agenttigi Aıdaıǵa sáttilik tileıdi! Bizdiń sulý arýymyzdy qoldaıyq!
