Maıamı týrnıri: Elena Rybakına álemniń besinshi raketkasyn jeńe ala ma

ASTANA. KAZINFORM – Qazaqstannyń birinshi, álemniń 2-raketkasy Elena Rybakına Maıamı (AQSh) WTA 1 000 týrnırinde búgin sheshýshi kezdesýleriniń birin ótkizedi. 

Qazaqstandyq tennısshi álemniń 5-raketkasy, amerıkalyq Djessıka Pegýlamen jartylaı fınaldyń joldamasyn sarapqa salady. Qarsylastar osyǵan deıin ózara 8 ret kezdesip, sonyń beseýinde Rybakına jeńgen.

Eki apta buryn Rybakınanyń Indıan-Ýells (AQSh) masters jarysynyń shırek fınalynda Pegýlany 6:1, 7:6 (7:4) esebimen tize búktirgen edi. Jalpy, keıingi alty aıda qazaqstandyq tennısshi Pegýlany tórt ret qatarynan qapy qaldyrǵan. 

Bıylǵy maýsymda qos sportshy da áıelder tennısinde erekshe kózge túsip keledi. Rybakına 20 básekede qarsylastaryn jeńse, tek tórteýinde ese jibergen. Pegýlada bul kórsetkish – 19-3. 

Elena 2023 jáne 2024 jyldary Maıamıde fınalǵa deıin jetken. Djessıka bes jyl qatarynan keminde shırek fınalǵa shyqqan. Al 2025 jyly fınalda álemniń 1-raketkasy, Belarýs ókili Arına Sobolenkoǵa jol berdi – 5:7, 2:6.

Pegýla bul joly Rybakınadan qalaıda ese qaıtarýǵa tyrysatyny anyq. Match 25 naýryz kúngi Qazaqstan ýaqytymen saǵat 22.00-ge belgilengen. Báseke jeńimpazy A.Sobolenko nemese reıtıngide 45-orynda turǵan amerıkalyq Heılı Baptıstiń bireýimen jartylaı fınalda kezdesedi. 

Ekinshi jartylaı fınalǵa shyqqandar erterek anyqtaldy. Onda álemniń 4-raketkasy, amerıkalyq Korı Gaýff pen reıtıngide 14-oryndaǵy chehııalyq Karolına Mýhovamen fınal joldamasyn sarapqa salady. 

K.Gaýff shırek fınalda reıtıngide 12-satydaǵy shveıtsarııalyq Belında Benchıchti jarys jolynan taıdyrdy – 6:3, 1:6, 6:3. K.Mýhova álemniń 9-raketkasy, kanadalyq Vıktorııa Mbokony eline qaıtardy – 7:5, 7:6 (7:5).

Eske sala keteıik, budan buryn Elena Rybakınanyń Maıamı týrnıriniń shırek fınalyna shyqqanyn jazǵan bolatynbyz.