Maıamı tarıhyndaǵy eń qymbat kelisim: Tsýkerberg 170 mıllıon dollarǵa záýlim úı satyp aldy

ASTANA. KAZINFORM — Meta kompanııasynyń negizin qalaýshy Mark Tsýkerberg pen onyń jubaıy Prıstsılla Chan Florıda shtatyndaǵy Indıan Krık jasandy aralynan 170 mıllıon dollarǵa záýlim úı satyp aldy. Bul tranzaktsııa Maıamı tarıhyndaǵy eń qymbat mámile boldy, dep habarlady Bloomberg. 

Jyljymaıtyn múlik satýshylardyń aıtýynsha, mundaı kelisim somasy óte sırek bolsa da, aldaǵy ýaqytta elıtalyq turǵyn úı naryǵynda quny 100 mıllıon dollardan asatyn mámileler sanynyń ósetinin atap ótti. 

Indıan Krık araly Florıdanyń ońtústigindegi Maıamı Deıd okrýginde ornalasqan. Ol HH ǵasyrdyń basynda qurylǵan jáne shamamen 120 gektar jerdi alyp jatyr. Bul aımaq aýqatty menshik ıeleriniń kóp shoǵyrlanýyna baılanysty «mıllıarderler býnkeri» retinde belgili.

Araldaǵy jyljymaıtyn múlik ıeleri arasynda Amazon kompanııasynyń negizin qalaýshy Djeff Bezos, ınvestor Karl Aıkan jáne Djared Kýshner de bar.

Ótken jyly Tsýkerbergtiń jeke baılyǵy Bloomberg mıllıarderler ındeksi boıynsha alǵash ret 200 mıllıard dollardan asty. Bıznesmenniń baılyǵy negizinen Meta Platforms Inc aktsııalarynyń rekordtyq joǵary baǵasynyń arqasynda ósti.

Eske sala keteıik, Meta Mark Tsýkerbergtiń qaýipsizdigine 14 mıllıon dollar jumsaǵan bolatyn.