Maıamı kórmesinde Pıkassonyń jumysy urlandy
ASTANA. QazAqparat - Ispandyq sýretshi ári músinshi Pablo Pıkassonyń qolymen jasalǵan kúmis tabaq Maıamı qalasynda ótken «Art Bazel» zamanaýı óner festıvali kezinde urlanǵan. Joǵalǵan buıym 85 myń dollarǵa baǵalanady, dep habarlaıdy Agence France-Presse.
Polıtsııanyń aqparatynsha, urlyq 5 jeltoqsannyń túninde jasaldy. Kórme zaldary táýlik boıy kúzetiledi, alaıda beınebaqylaý taspalary barlyq núktelerde ornatylmaǵan. Urlyqty jasaý sáti tirkelmedi.
Qylmyskerler kórmede odan da baǵaly jádigerlikter, sonyń ishinde quny 365 myń dollar turatyn qysh buıymdary bolǵanymen, ózderimen birge tek bir óner týyndysyn ǵana alyp ketti.
Visage aux mains dep atalatyn tabaq Pıkassonyń 1956 jyly jasaǵan 20 kúmis buıymdarynyń biri bolyp tabylady.
Maıamıde jyl saıyn jeltoqsanda ótetin «Art Bazel» festıvaliniń aıasynda túrli kórmeler, keshter jáne basqa da sharalar uıymdastyrylady. Osy jyly ol 4-7 jeltoqsan aralyǵynda ótýde.
