Maıamı qalasynda ótken AQSh-Ýkraına formatyndaǵy kelissózde ne aıtyldy

ASTANA. KAZINFORM — AQSh prezıdenti Donald Tramptyń arnaıy ókili Stıven Ýıtkoff Florıda shtatynyń Maıamı qalasynda ótken AQSh-Ýkraına formatyndaǵy kelissózder barysynda qandaı máselelerge basa nazar aýdarylǵanyn aıtty, dep habarlaıdy DW.

Arnaıy ókildiń aıtýynsha, kezdesý barysynda tórt negizgi másele talqylanǵan. Atap aıtqanda, Tramptyń 20 tarmaqtan turatyn beıbit josparyn odan ári damytý, qaýipsizdik kepildikteriniń kópjaqty júıesi boıynsha ustanymdardy kelisý, Ýkraınaǵa arnalǵan amerıkalyq qaýipsizdik kepildikteri júıesi boıynsha kózqarastardy naqtylaý, sondaı-aq «ekonomıkalyq damý men órkendeý josparyn» ilgeriletý máseleleri qaralǵan.

Stıven Ýıtkoff kelissózder aldaǵy qadamdardyń merzimi men rettiligine qatysty bolǵanyn atap ótti.

– Ortaq basymdyqtarymyz – adam ólimin toqtatý, kepildendirilgen qaýipsizdikti qamtamasyz etý jáne Ýkraınany qalpyna keltirý, turaqtylyq pen uzaq merzimdi órkendeýge jaǵdaı jasaý. Beıbitshilik tek soǵys qımyldaryn toqtatýmen shektelmeýi kerek, ol turaqty bolashaqtyń berik negizine aınalýy tıis, – dedi ol.

Sondaı-aq Ýıtkofftyń aıtýynsha, Maıamıde ýkraın delegatsııasy eýropalyq áriptesterimen de kezdesýler ótkizgen.

Ýkraına delegatsııasynyń quramynda eldiń Ulttyq qaýipsizdik jáne qorǵanys keńesiniń hatshysy Rýstem Ýmerov jáne Ýkraına Qarýly kúshteri Bas shtabynyń bastyǵy Andreı Gnatov bolǵan.

Al amerıkalyq delegatsııa quramynda Tramptyń kúıeý balasy Djared Kýshner, Aq úı qyzmetkeri Djosh Grıýnbaým jáne Stıven Ýıtkofftyń ózi qatysty.

Talqylaýǵa Ýkraına, AQSh jáne Eýropanyń ortaq strategııalyq ustanymyn kelisý úshin eýropalyq elderdiń ulttyq qaýipsizdik jónindegi negizgi keńesshileri de qosylǵan.

Buǵan deıin habarlanǵandaı, 20 jeltoqsanda Maıamı qalasynda AQSh pen Ýkraına arasyndaǵy eki kúndik kelissózder aıaqtalǵan. Ýkraına delegatsııasynyń basshysy Rýstem Ýmerov Maıamıde «amerıkalyq jáne eýropalyq áriptestermen» kezdesý ótkenin málimdegenimen, onyń egjeı-tegjeıin ashpaǵan edi.