Maıa Maneza qazaqy saltpen uzatyldy
ASTANA. 28 sáýir. QazAqparat - Aýyr atletıkadan London olımpıadasynyń chempıony Maıa Maneza turmysqa shyqty. Onyń jary - aýyr atlet, Azııa oıyndarynyń chempıony Vıacheslav Ershov.
Bul týraly «Alaman» ulttyq sport portalynan habarlady.
Uzatý toıy Maıa Maneza oqıtyn Qazaq ulttyq qyzdar ýnıversıtetinde boldy. Rásim qazaqy salt dástúrge saı ótti. Kúıeý jigittiń aldyna arqan tartylyp, ony shashýmen qarsy aldy. Al Maıa Manezaǵa qazaqy ulttyq kıim, sáýkele kıgizipti uıymdastyrýshylar. Manezanyń ustazdary shashý shashyp, aqsaqaldar aq batasyn berdi. Maıanyń qurbylary syńsý aıtyp, ony kúıeý jigit ekeýin aq matanyń ústimen shyǵaryp saldy.
«Maıa ekeýmiz bes jyldan beri tanyspyz. Aýyr atletıkadan Qazaqstan quramasynda oqý jattyǵý kezinde tanystyq. Keıin birge jattyǵyp júrip, bir-birimizdi unatyp qalǵanymyzdy túsindik. Jaqynda Maıaǵa otbasyn qurýǵa usynys jasadym. Ol qarsy bolǵan joq. Úılený toıymyzdy dúrkiretip jasamaımyz. Osy sharanyń ózi biz úshin qýanysh. Aldaǵy ýaqytta ekeýmiz Manezaǵa memleket bergen páterde turamyz», - dedi kúıeý jigit Vıacheslav Ershov.
«Men bul kúndi kóp kúttim. Vıacheslav meniń ómirdegi eń jaqyn adamym. Qazir ekeýmiz birge jattyǵý jumystaryn júrgizemiz. Endi otbasymdy asyrap, ana bolýym kerek. Biraq aýyr atletıkamen áli de aınalysamyn. Bastysy, eń jaqyn adamym janymda, - dep jymıdy olımpıada chempıony Maıa Maneza.
