Maı salynǵan qaryn Naýryz kójege erekshe dám beredi - Zere ájeı

KÓKShETAÝ. QazAqparat - Naýryz kóje -Ulys uly kúni jasalatyn qasıetti as. Bul taǵamnyń jeti túrli dámnen ázirlenetinin bárimiz jaqsy bilemiz. Alaıda, kójeni elimizdiń ár óńirinde árkim árqalaı pisiredi. Osyny alǵa tartyp, QazAqparat tilshisi mereke qarsańynda kópti kórgen, tirliktegi tájirıbesi mol kókshetaýlyq Zere Espaıqyzyn sózge tartyp, Kókshe jerinde Naýryz kójeni daıyndaý ádisimen bólisýin ótindi.

Basynan aq jaýlyǵy túspeıtin, sózinen parasat paıymy seziletin, ımany júzinen meıirim bop tógiletin Zere Qıyqova apamyzdyń esimi elge etene tanys. Osy kúni Zere apa Qazaqstan halqy Aqmola assambleıasynyń janyndaǵy Analar keńesin basqaryp keledi.

Zere apanyń aıtýynsha, dámge qosatyn dándi daqyldardy da árkim óz qalaýymen salady: biri bıdaı, biri arpa salyp jatsa, endi bireýler júgeri, kúrish, qaraqumyq qosady, áıteýir talǵamymen tańdandyryp, dámdi etip ázirleıdi. Keıbir analarymyz qurtty ezip, malta salsa, endi biri aıran, qatyq quıady. Sondyqtan bolar, ár óńirdiń ár úıdiń Naýryz kójesi bir-birine uqsamaıdy.

"Men ata-ájemniń baýyrynda ósken edim. Sodan bolar, qazaqy tárbıe qanyma sińgen. «Naýryz kójeni toıyp ishý kerek, sonda jyl boıy toqshylyq bolady!» degendi úlkenderden jıi estıtinmin. Men kójeni pisirýdi ájemnen úırengem. Bizdiń Analar keńesi jyl saıyn Ulystyń uly kúni Qazaqstan halqy Aqmola assambleıasymen birlesip, Naýryz kóje qaınatyp, ony mereke-dýmandy toılaýǵa ortalyqqa jınalǵan qaýymǵa úlestirip keledi. Negizi, quramyna jeti ónimnen de kóp taǵam qosýǵa bolady. Aldymen súr etti pisiremiz. Basqa ydysqa sorpaǵa qosatyn jarmalardy bólek-bólek pisirip alamyz. Jarmalardyń ártúrinen qosamyz. Mysaly kúrish, tary, arpa, qaraqumyq, keıde burshaq ta qosamyz. Sodan keıin súr etti, órikti usaqtap týrap, meıiz ben jarmalardy birge barlyǵyn et pisken sorpaǵa qurtty ezip aralastyramyz. Kóje daıyn bolǵannan keıin qaımaq qosamyz. Jalpy, árbir adamnyń ózindik daıyndaý tásili bolady. Óz bilgenimmen bólisip jatyrmyn. Ondaǵy oıym óskeleń urpaq oı túısin, úırensin degenim ǵoı", - deıdi apa.

Sonymen qatar, Zere Espaıqyzy óńirde keıbir kóne kóz qarııalardyń maı saqtaǵan qaryndy tazalap jýyp, kójeniń túbine salatynyn da aıtýda. Mundaı Naýryz kóje óte dámdi bolatyn kórinedi.

"Bul - ejelden kele jatqan kóne ádis. Qarynǵa tuz ábden sińgendikten de kójege erekshe dám beredi", - deıdi Zere Qıyqova.