Maı eksporty tórt jylda 4 esege ósip, 963 mln dollarǵa jetti
ASTANA. KAZINFORM – Qazaqstandyq maı salasynyń eksporttyq kirisi tórt jylda tórt esege ósip, 963 mln AQSh dollaryna jetti. Bul týraly QR Premer-mınıstriniń orynbasary — ulttyq ekonomıka mınıstri Serik Jumanǵarın Astanada ótken FOS 2026: Fats and Oils Conference V Halyqaralyq maı konferentsııasynyń ashylýy kezinde habarlady, dep habarlaıdy Úkimettiń baspasóz qyzmeti.
Konferentsııa jumysyna 18 memlekettiń, halyqaralyq uıymdardyń, jetekshi álemdik kompanııalardyń, qarjy ınstıtýttarynyń, salalyq qaýymdastyqtar men saraptamalyq qoǵamdastyqtardyń ókilderi qatysty.
Konferentsııany ashqan Premer-mınıstrdiń orynbasary — ulttyq ekonomıka mınıstri Serik Jumanǵarın sońǵy jyldary maı óndirý salasy agroónerkásiptik keshen segmentiniń birinen ulttyq ekonomıkanyń strategııalyq mańyzdy baǵytyna, ekonomıkany ártaraptandyrýdyń, qaıta óńdeýdi damytý men qosylǵan quny joǵary ónim jasaýdyń tabysty úlgisine aınalǵanyn atap ótti.
— Nebári tórt jyldyń ishinde qazaqstandyq maı ónimi eksportynyń valıýtalyq túsimi tórt esege, 240 mln-nan 963 mln AQSh dollaryna deıin ósti. Óndiris rekordtyq 1,6 mln tonnaǵa, qaıta óńdelgen aýylsharýashylyǵy ónimi eksportyndaǵy salanyń úlesi 27%-ǵa jetti. Bul otandyq óndirýshilerdi qoldaý, qaıta óńdeýdi damytý men ınvestıtsııa tartýdaǵy dáıekti memlekettik saıasattyń nátıjesi. Qaıta óńdeýmen birge aýyl sharýashylyǵy da damyp, maıly daqyl alqaby keńeıýde. Fermerlik sharýashylyqtyń tabystylyǵy artty. Jańa jumys oryndary ashylyp, kólik jáne eksporttyq ınfraqurylym damyp jatyr, — dep atap ótti vıtse-premer.
Búgingi tańda Qazaqstan kúnbaǵys maıyn eksporttaý jóninen álemde altynshy orynda. Ol ónimdi Qytaı naryǵyna ekinshi iri jetkizýshi. Sondaı-aq, respýblıka Eýropalyq Odaqqa kúnbaǵys unyn basty jetkizýshiler qataryna kirip, Ortalyq Azııa memleketteriniń qajettiligin tolyqtaı óteı alady.
Serik Jumanǵarınniń aıtýynsha, salanyń aldaǵy mindeti — iri eksporttaýshy mártebesinen álemdik kóshbasshynyń birine ótý. Ol úshin 2026-2028 jyldarǵa arnalǵan maı ónimi eksportyn damytý jónindegi jol kartasy júzege asyrylyp jatyr.
— Bizdiń maqsatymyz — salanyń valıýtalyq túsimin jylyna $1,5 mlrd-tan asa ulǵaıtý. Qazaqstannyń kúnbaǵys maıynyń iri álemdik eksporttaýshylary arasyndaǵy pozıtsııasyn nyǵaıtyp, salanyń álemdik kóshbasshylarynyń úshtigine kirý úshin negiz qurý qajet, — dep atap ótti ol.
Osy maqsatqa qol jetkizý úshin joǵary rentabeldi maıly daqyldyń egis alqabyn keńeıtý, zamanaýı agrotehnologııa esebinen ónimdilikti arttyrý, tereń óńdeýge ınvestıtsııa tartý, sondaı-aq kólik-logıstıkalyq ınfraqurylymdy jáne halyqaralyq saýda baǵyttaryn damytý jumysy jalǵasady.
Qazaqstan ulttyq qaıta óńdeýshiler qaýymdastyǵynyń tóraǵasy ıAdıkar Ibragımov sala eksporttyq geografııany belsendi túrde keńeıtip, logıstıkalyq sheshimdi jetildirýde ekenin jetkizdi.
Máselen, 2026 jyly Aqtaý portynda alǵash ret teńiz kemesine ósimdik maıyn aýystyryp tıeý júzege asyryldy. «QTJ» UK» AQ qoldaýymen Qytaı baǵytynda Dostyq — Alashankoý shekaralyq ótkeli arqyly astyq tasıtyn kólikpen túıirshiktelgen kúnbaǵys unyn tájirıbelik jetkizý bastaldy.
Sonymen qatar 2025 jylǵy kúzde Qazaqstan tarıhynda alǵash ret Shyǵys Qazaqstan oblysynan Qytaıdyń Tszıansý provıntsııasyna fleksıtankter arqyly kúnbaǵys maıy 40 fýttyq konteınermen jóneltildi. Júk 12 kúnde 4 700 shaqyrymdy júrip ótip, konteınermen tasymaldaýdyń tıimdiligi men joǵary jyldamdyǵyn kórsetti.
Aıta ketelik Qazaqstan kúnbaǵys maıy eksportynan álemde 6-orynǵa shyqqan edi.
