Maı aýdanynda omyrtqa aýrýlaryn emdeıtin elimizdegi alǵashqy ortalyq ashylady - Pavlodar oblysy
PAVLODAR. QazAqparat - Pavlodar oblysyndaǵy Maı aýdanynda 10 jeltoqsan kúni omyrtqa aýrýlaryn emdeıtin elimizdegi alǵashqy memlekettik ortalyq ashylady.
Bul týraly aýdandyq aýrýhananyń bas dárigeri Baıbolat Qazybekov málim etti, dep habarlaıdy pavlodarnews.kz.">pavlodarnews.kz.
«Ortalyq omyrtqa aýrýlaryna shaldyqqan jáne túrli jaraqattan keıin tirek-qımyl apparaty buzylǵan adamdardy ońaltýǵa baǵyttalǵan», - deıdi ol. - Olardyń keıbireýleriniń aıaqtary jumys isteıdi. Alaıda arbaǵa tanylǵan keıbir jandar qalaı áreket etýin, nemen aınalysý kerektigin bilmeıdi. Sondyqtan mundaı adamdarǵa alǵashqy qadam jasap, baldaqpen júrýdi úıretý - ortalyqqa júkteletin basty mindet. Búginde aýdanda túrli jaǵdaıda jaraqat alǵan jáne omyrtqa aýrýlary bar 20 shaqty adam tizimge alynǵan. 30 orynǵa eseptelgen mekemede naýqastar 30-40 kún em qabyldaıdy. Aq jeleńdiniń aıtýynsha, bul - Qazaqstanda resmı túrde tirkelgen alǵashqy memlekettik ońaltý ortalyǵy. Munda arnaıy reabılıtolog maman naýqastarǵa birinshi kezekte ózine-ózi kómek kórsetýdi, ekinshiden, ózine jáne aınaladaǵylarǵa paıdasyn tıgizýdi jáne qoǵamǵa beıimdelýdi úıretedi. Sondaı-aq, sý asty massaj, tranejer zaly jáne emdik dene tárbıesi qarastyrylǵan.
Aıta keterligi, nysan 2009 jyly ashylǵan aýdandyq ortalyq aýrýhananyń ishinde 1500 sharshy metr aýmaqta ornalasqan. Mekemeni otandyq jáne reseılik qural-jabdyqtarmen qamtamasyz etý úshin oblystyq bıýdjetten 57 mln teńge bólingen. Barlyǵy 40-qa jýyq qyzmetker jumys isteıdi.
