Maxmud Qasymbekov atyraýlyq stýdenttermen kezdesti
ATYRAÝ. QazAqparat - Kezdesý «N.Nazarbaev: dáýir, tulǵa, qoǵam» kóshpeli kórmesi aıasynda ótti, dep xabarlaıdy QazAqparat tilshisi óńirlik kommýnıkatsııalar qyzmetine silteme jasap.
Búgin H.Dosmuxamedov atyndaǵy Atyraý memlekettik ýnıversıtetinde stýdentterge arnalǵan Qazaqstan Respýblıkasynyń tuńǵysh prezıdenti - Elbasy kitapxanasynyń «Rýxanı jańǵyrý : Bolashaqqa bastar jol» semınar-trenıngi ótti. Semınar barysynda QR prezıdenti keńsesiniń basshysy Maxmud Qasymbekov kórme týyndylary týraly baıandady.
«Atyraýǵa kelgen issapar barysynda eń aldymen Elbasynyń ómir joly týraly kitaptardy tabystaýdy jón kórdim. Bul kitaptarda prezıdentimiz, onyń ómirbaıany, sondaı-aq prezıdenttik joly týraly derekter bar. Osy derekterdi oqý úrdisine paıdalanýdy usynamyn. Jastarymyz el men Elbasy tarıxynan xabardar bolýy kerek»,- dedi Maxmud Qasymbekov.
Semınarǵa oblys ákimi Nurlan Noǵaev ta qatysyp, jergilikti atqarýshy organdar turǵyndardyń kórme jádigerlerimen tanysýyna barlyq jaǵdaıdy jasaıdy dep sendirdi.
«Barsha atyraýlyqtar atynan Maxmud Bazarqululyna alǵysymdy bildiremin. Sebebi, búgin uıymdastyrylyp otyrǵan kezdesý sizderge Elbasyny jańa qyrynan tanýǵa múmkindik beredi. Semınar kezinde tanystyrylǵan týyndylardy oqý úrdisine qoldaný ıdeıasyna tolyqqandy kelisem. Óz tarapymyzdan kórmeniń joǵary deńgeıde ótýi úshin barlyq jaǵdaıdy jasaımyz»,- dedi óńir basshysy. 
Sondaı-aq, Maxmud Qasymbekov H.Dosmuhamedov atyndaǵy Atyraý memlekettik ýnıversıtetinde qurylǵan «I Space» kovorkıng ortalyǵynda boldy. Ortalyqta stýdentter zamanaýı ınfraqurylymdy damytyp, jańa jobalardy, kásipkerlik ıdeıalardy júzege asyryp, aǵylshyn tilin úırene alady.
Aıta keteıik, 18 qyrkúıek kúni Atyraýda «N.Nazarbaev: dáýir, tulǵa, qoǵam» Elbasynyń kóshpeli qor kórmesiniń ashylý saltanaty ótti. Kórmeni Sh.Sarıev atyndaǵy oblystyq murajaıda 2 aı kóleminde tegin tamashalaýǵa bolady.
