Mavrodı jańa qarjylyq pıramıda qurady
ASTANA. 2 maýsym. QazAqparat - Sergeı Mavrodı jańa qarjylyq pıramıda qurylatynyn málim etti. Ol MMM-2012 dep atalyp, eski MMM-2011 pıramıdasyn jańǵyrtý úshin qurylmaq. Bul jóninde Eýrazııa birinshi arnasy málimdedi.
Infox.ru habarlaǵandaı, Mavrodıdiń aıtýynsha, oǵan qarsy qylmystyq istiń qozǵalǵany týraly qaýesettiń saldarynan adamdar MMM-2011 pıramıdasynan aqshalaryn alýǵa jappaı umtylǵan. «Paralleldi pıramıda qurýdyń mánisi nede? Ol ne úshin qajet? Qazirgi túıtkilderdiń jańa pıramıdaǵa qatysy bolmaıdy. Ol jańadan bastalmaq. Eski pıramıda budan da tómen jaǵdaıda eshbir qıyndyqsyz, bir jarym jyl jumys jasaǵan edi. Qazir biraz tóseldi, tájirıbe bar, bul júıege berilgen ári jaqsy jumys jasaıtyn jetekshiler bar, barlyǵy anyq. Nobaıy ábden jetildirilgen!» - dep Mavrodı óz saıtynda habar taratyp úlgerdi.
Aıta keteıik, MMM-2011 júıesine bir jarym jyl ishinde dúnıejúzi boıynsha 35 mıllıonnan astam adam kirgen.
