Mavrıtanııa Prezıdenti bıyl kúzde Astanaǵa resmı saparmen keledi
Kezdesý barysynda arnaıy ýákil Mavrıtanııa basshysyna Qazaqstan Prezıdenti Nursultan Nazarbaevtyń 2017 jylǵy 10-11 qyrkúıekte Astana qalasynda ótetin Islam yntymaqtastyq uıymynyń ǵylym jáne tehnologııalar boıynsha birinshi sammıtine shaqyrtýyn tabys etti. Óz kezeginde shaqyrtýdy úlken yqylaspen qabyl alǵan Mavrıtanııa basshysy aǵymdaǵy jyldyń qyrkúıeginde Astanaǵa sammıtke qatysý úshin resmı saparmen barý josparyn rastady, dep habarlaıdy QazAqparat Syrtqy ister mınıstrliginiń baspasóz qyzmetine silteme jasap.
Kezdesýde Arnaıy ýákil Mavrıtanııanyń qazaqstandyq syrtqy saıasat bastamalaryna, sonyń ishinde BUU Qaýipsizdik Keńesindegi jumysyna, Islam uıymynyń azyq-túlik qaýipsizdigi beldeýin qurýǵa, sondaı-aq Astanada «EKSPO-2017» halyqaralyq kórmesin ótkizýge qatysty kórsetken qoldaýy úshin rızashylyǵyn bildirdi. Sonymen qatar, Aqylbek Kamaldınov Mavrıtanııanyń halyqaralyq terrorızmmen kúrestegi jáne óńirlik turaqtylyqtaǵy rólin joǵary baǵalady.
Budan bólek, Nýakshottaǵy jumys sapary aıasynda QR Prezıdentiniń Arnaıy ýákili Mavrıtanııa Syrtqy ister mınıstri Isselk Ýld Axmad Izıd Bıxpen jáne el Prezıdentiniń halyqaralyq máseleler jónindegi keńesshisi Mýstafa Axmad Daýmmen kezdesti. Onda memleketter arasyndaǵy ártúrli salalar boıynsha ekijaqty yntymaqtastyqtyń perspektıvalyq baǵyttary talqylandy. Mavrıtanııadaǵy aýyl sharýashylyǵy, balyq ónerkásibi jáne taý-ken, munaı óndirý sektory týraly áńgimeler órbidi.
«Kezdesýde halyqaralyq jáne óńirlik ózekti máseleler boıynsha taraptar óz ustanymdaryn naqtylady. Bul rette Mavrıtanııa tarapy sırııalyq daǵdarysty retteýge baǵyttalǵan resmı Astananyń dıplomatııalyq kúsh-jigerine qoldaý bildiretinin jetkizdi. Jumys saparynyń qorytyndysy boıynsha A. Kamaldınov Mavrıtanııanyń buqaralyq aqparat quraldary ókilderine suhbat berdi», - delingen baspasóz baıanynda.
