Mavrıkıı prezıdenti syıǵa berilgen nesıe kartasynyń kesirinen otstavkaǵa ketti
ASTANA. QazAqparat - Mavrıkıı Respýblıkasynyń prezıdenti Amına Gýrıb-Fakım qarjylyq alaıaqtyq jasady degen habar taraǵan soń otstavkaǵa ketti, dep habarlaıdy «QazAqparat» HAA ABC News-ke silteme jasap.
Onyń qorǵaýshysynyń sózine qaraǵanda, Gýrıb-Fakım eldiń «ulttyq múddesin» oılaǵandyqtan otstavkaǵa ketý týraly ótinish jazǵan.
Buryn jergilikti BAQ-ta prezıdent Angolanyń úkimettik emes uıymy syıǵa tartqan nesıe kartasynan 27000 dollar mólsherinde jeke ózine zattar satyp alǵany týraly aqparat taraǵan bolatyn. Ol uıym Mavrıkııdegi qyzmetin jandandyrý maqsatynda osyndaı qadamǵa barǵan bolýy múmkin. Onyń ústine qazir Portýgalııada uıymnyń negizin qalaýshyǵa qatysty alaıaqtyq jasady degen kúdikpen tergeý júrip jatyr.
BBC-diń habarlaýynsha, nesıe kartasyn Gýrıb-Fakımge Jer Ǵalamshary Instıtýtynyń shtattan tys dırektory retinde bergen.
Gýrıb-Fakım saıası kampanııanyń qurbany bolǵanyn aıtyp, otstavkaǵa ótinish jazbaıtynyn málimdegen bolatyn. Biraq senbi kúni sheshimin ózgertken. Onyń otstavkasy 23 naýryzda kúshine enedi.
