Maýsymnyń aıaǵynda Qyzylordada kúrish jármeńkesi ótedi

ASTANA. QazAqparat – Qyzylorda oblysynyń ákimi Nurlybek Nálibaev Ortalyq kommýnıkatsııalar qyzmetinde ótken brıfıngide kúrish baǵasynyń qymbattaýyna túsinik bildirdi, dep habarlaıdy QazAqparat tilshisi.

«Ózderińiz jaqsy bilesizder. Kúrishke qajetti tehnıkalardyń baǵasy qazir qymbattap jatyr. Oǵan jumsaıtyn janar-jaǵarmaıdyń da, qural-jabdyqtyń da baǵasy artýda. Onyń ústine qazir búkil jerde jalaqy kóterilip jatyr. Kúrish salasynda jumys istep júrgen eńbek adamdarynyń da jalaqysy joǵarylaýda. Munyń bári saıyp kelgende, kúrish baǵasynyń ósýine ákeledi. Degenmen, biz muny baqylaýda ustap, jumys istep jatyrmyz. Ózińiz aıtqandaı, tekserý boldy. Shynynda 6-7 kásiporynda osyndaı derekter anyqtaldy. Oǵan baılanysty 100 mln teńgege jýyq aıyppuldar salyndy. Olar aldaǵy ýaqytta kúrish baǵasyn sebepsiz ósirmeıtin bolady. Biz ony baqylaýda ustap otyrmyz. Qazirgi tańda bir keli kúrish baǵasy 400 teńgeden asyp ketti. Biraq Úkimet basshysynyń tapsyrmasy boıynsha ózimizdiń basqa áriptesterge, óńirlerge qoldaý kórsetip jatyrmyz», - dedi aımaq basshysy.

Osyndaı qoldaý aıasynda óńirler kúrishtiń bir kelisin 380 teńgeden satyp alýǵa múmkindik alǵan.

«Birneshe óńir bizdiń kásiporyndarmen kelisimshartqa otyrdy. Biz olarǵa kúrishtiń bir kelisin 380 teńgeden bosatyp jatyrmyz. Endi aldaǵy maýsym aıynyń 23-25-inde úlken kúrish jármeńkesi ótedi. Sol jármeńkege de áriptesterimizdi shaqyryp jatyrmyz. Qazirden bastap bizdegi kúrish óndirýshilermen kelisimshartqa otyryp, aldaǵy ýaqytta arzan baǵamen alýǵa bolady. Oǵan kómektesemiz.

Bul máseleniń ekinshi jaǵyn da qaraýymyz kerek. Kúrishtiń baǵasy óskeni - bir shetinen shyǵyny men eńbegi óte kóp. Sol salada jumys istep júrgen adamdar baǵanyń shamaly bolsa da óskenin qalaıdy», - dedi Nurlybek Nálibaev.