Maýsymnyń 1-nen bastap Stepnıakten Kókshetaýǵa avtobýs qatynaı bastaıdy
KÓKShETAÝ. QazAqparat – Aqmola oblysynda maýsymnyń 1-nen bastap «Stepnıak-Kókshetaý» baǵytyndaǵy «Gazel» shaǵyn avtobýsynyń qozǵalysy jandanady.
Sonymen birge, aýdan ortalyǵynda qalaishilik avtobýstar jumysyn bastaıdy, dep habarlaıdy QazAqparat tilshisi Aqmola oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentine silteme jasap.
Vedomstvonyń málimetinshe, Birjan sal aýdany tasjoldan shalǵaı ornalasqan. Sondyqtan, aýdan turǵyndaryna qatynap turý úshin qoǵamdyq kólikterdiń qaıta jumysyna kirisýi mańyzdy.
«Jeke kásipker Valerıı Lebedev jolaýshylar tasymalymen aınalysatyn uıymnyń jumys algorıtmimen tanys. Birjan sal aýdandyq taýarlar men kórsetiletin qyzmetterdiń sapasy men qaýipsizdigin baqylaý aýmaqtyq basqarmasynyń qyzmetkerleri QR Bas sanıtarlyq dárgeriniń № 37 qaýlysyna 15 qosymshada kórsetilgen talaptardy oryndaýdy baqylaýda ustaıdy», - deıdi vedomstvodan.
Vedomstvodan atap ótkendeı, kásipker men eki júrgizýshi PTR (polımeraldy tizbek reaktsııasy) ádisi boıynsha synama tapsyrdy. Testiń barlyǵy teris nátıje kórsetti. Bas dárigerdiń qatysýymen kólik quralyna dezınfektsııa júrgizildi.
