Maýsymnan beri «Embimunaıgazda» 136 adam koronavırýs juqtyrdy
ATYRAÝ. QazAqparat – Atyraý oblysyndaǵy «Embimunaıgaz» AQ-da maýsymnan beri 136 adam koronavırýs juqtyrdy, dep habarlaıdy QazAqparat.
Kompanııanyń qoǵammen baılanys qyzmetiniń málimetinshe, maýsymǵa deıin «Embimunaıgaz» AQ-nyń óndiristik nysandarynda qyzmetkerlerdiń ınfektsııa juqtyrýy tirkelmegen. Al, 3 jumysshydan qaýipti indet jumysqa shyǵar aldyndaǵy mindetti skrınıngten ótý kezinde anyqtalǵan.
«Maýsymnyń basynan beri Jylyoı aýdanyndaǵy Tereń-Ózek, Qısymbaı, Qyzylqoǵa aýdanyndaǵy Kenbaı ken oryndarynda «Embimunaıgazdyń» 62 jáne merdiger kompanııalardyń 55 qyzmetkerinde COVID-19 anyqtaldy. Buǵan qosa, mindetti skrınıng kezinde «Embimunaıgazdyń» 19 jumysshysynan vırýs juqtyrý jaǵdaıy tirkeldi. Barlyq jumysshylar qajetti em alý úshin Qulsary jáne Atyraý qalalaryndaǵy juqpaly aýrýlar aýrýhanalaryna jatqyzyldy. Sımptomsyz aýyryp jatqan jumysshylar otbasynyń ózge múshelerinen oqshaýlanyp, úı karantınine ornalastyryldy. Al, úıde oqshaýlaý talaptaryn saqtaýǵa múmkindigi joq adamdar Atyraý qalasynyń Bereke yqsham aýdanyndaǵy arnaıy jabdyqtalǵan úılerge karantınge jatqyzyldy. PTR testileri teris nátıje kórsetken jumysshylar jumys oryndarynda baqylaýǵa alyndy» -dep habarlady kompanııanyń qoǵammen baılanys qyzmeti.
Qazir barlyq ken oryndarynda jumys shtattyq rejımde júrgizilip keledi. «Jylyoımunaıgaz», «Qaınarmunaıgaz» MGÓB-niń jáne atalǵan óndiristik bólimshelerde jumys isteıtin «Embimunaıenergo» basqarmasynyń qyzmetkerleri úshin jumys vahtasynyń merzimi 14-ten 28 kúnge deıin uzartylǵan. Jańa algorıtmge sáıkes vahtaǵa jiberilgen «Embimunaıgazdyń» jáne merdiger mekemelerdiń barlyq jumysshysy PTR-testten keıin vırýs juqtyrýdy boldyrmaý maqsatynda 5 kúndik karantınge jatqyzylady. Qaýipsizdikti qamtamasyz etý maqsatynda ortalyq apparattyń bir bóligi qashyqtan jumys isteý rejımine jiberilgen. Al, qyzmetkerlerdiń bas keńse ǵımaratynda bolý ýaqyty túski úzilissiz saǵat 15.00-ge deıin qysqartylǵan.
Budan buryn Atyraýda NCOC qyzmetkerinen koronavırýs tabyldy.
