Maýsymnan bastap álem boksy shlemsiz jekpe-jekke kóshpek
ASTANA. 14 aqpan. QazAqparat - Álem boksy aǵymdaǵy jyldyń maýsym aıynan bastap shlemsiz jekpe-jekke kóshedi.
Bul jaıynda búgin Astanada ótip jatqan bokstan 4 eldiń joldastyq kezdesýi aldyndaǵy baspasóz májilisinde aıtyldy, dep habarlaıdy BAQ.KZ.
«AIBA sheshimi boıynsha 1 maýsymnan bastap barlyq jarystar shlemsiz ótkiziletin bolady. Bul bokstyń sánin keltiredi»,- dedi Ázerbaıjan quramasynyń bas bapkeri Vladımır Zolotorev.
Ýkraınanyń bapkeri Dmıtrıı Sosnovskıı bolsa, jaraqattar shlem kıip oınasa da bolatyndyǵyn aıtady. «Kásipqoı boksshylar shlemsiz 12 raýnd judyryqtasady jáne jaraqat az. Áýesqoıda nebári 3 raýnd. Jaraqattar burynda da bolatyn, odan qorqýdyń qajeti joq»,- dedi ol.
Aıta keteıik, byltyrǵy jyldyń karasha aıynda ótken Qazaqstan birinshiligi shlemsiz ótken edi. Kezdesýlerdiń tartysty ári qyzyq bolǵanyn kórermender de, bapkerler de moıyndap otyr.
