Maýsymdyq jumys bolǵanymen, eńbek ótili tolyq 1 jylǵa esepteletin salalar tizimi bekitiledi

ASTANA. QazAqparat – Maýsymdyq jumys isteıtin, biraq eńbek ótili tolyq jyl boıyna esepteletin ónerkásip salalarynyń tizimi ázirlendi. Bul «Ashyq» NQA portalynda jarııalanǵan Úkimet qaýlysynyń jobasynda kórsetilgen, dep habarlaıdy QazAqparat tilshisi.

Maýsym ishindegi jumysyna baılanysty zeınetaqy tólemderin taǵaıyndaý úshin bir jylǵy jumys ótiline esepke alynatyn ónerkásipter tizimi:

1. Aǵash daıyndaý jáne aǵash aǵyzý

2. Et jáne sút ónerkásibi

3. Balyq ónerkásibi

4. Ónerkásiptiń qant jáne konservi salalary.

«Qaýly jobasy jasyna baılanysty zeınetaqy tólemderin alýshylardyń eńbek ótilin jeńildikpen esepteýge baǵyttalǵan. Qaýly 2023 jylǵy 1 shildeden bastap qoldanysqa engiziledi», - dep túsindirme berilgen qujatqa.

Sonymen qatar, jasyna baılanysty zeınetaqy tólemderin 1,5 ese mólsherinde taǵaıyndaý úshin jumys ótili jeńildikpen esepteletin qyzmetkerler tizimine sot-medıtsınalyq saraptamany jáne patologııalyq-anatomııalyq dıagnostıkany júzege asyratyn uıymdarda keıbir laýazymdardy engizý josparlanyp otyr.

Qujat 6 sáýirge deıin kópshilik talqylaýda bolady.