Maýsymdy «Shahter» jáne «Aqtóbe» ashady
ASTANA. QazAqparat - Jyl saıyn el fýtbolynyń jańa maýsymyn sýperkýbok matchymen ashý bizde de dástúrge aınalǵan. Bıylǵy maýsymashar sýperkýbok matchy 9 naýryz kúni ótedi.
Qazaqstanda alǵash ret sýperkýbok oıyny 1995 jyly ótkizilgen. Onda 1994 jylǵy el chempıony «Elimaı» men kýbogymyzdyń ıegeri «Vostok» kezdesken. Shyǵysqazaqstandyq derbıde Semeı klýby Óskemen fýtbolshylarynan 2:0 esebimen óktem túsken.
Sodan keıin biraz jyl sýperkýbok oıyny ótpeı qaldy. Tek 2008 jyly ǵana qaıta sabaqtalyp, 2010 jyldan beri dástúrli túrde ótkizilip keledi, dep habarlaıdy «Alash aınasy» gazeti.
Bıylǵy sýperkýbok matchy tipten qyzyq bolmaq. Eki klýbymyz da byltyr Eýrokýbokta kóńilge qonymdy óner kórsetken. Ásirese «Shahter» Eýropany biraz shýlatqan. Ári ekeýi de maýsym aralyǵynda quramdaryn ekshep, nyǵaıtyp jatyr. Bul turǵyda «Aqtóbeniń» transferleri kópshilikti alańdatýda.
Astana Qaraǵandyǵa jaqyn. Sondyqtan kenshiler klýby ádettegideı óz jankúıerlerin birneshe avtobýspen apara alady. Al «Aqtóbeniń» fanattary - áýelden belsendi. Olar da qalmaıdy.
Qazaqstan fýtbol federatsııasy «shamamen Qaraǵandydan 8 myńdaı, Aqtóbeden 4 myńdaı jankúıer kelýi kerek» dep boljam jasap otyr. Áliptiń artyn tosaıyq. Áıteýir qyzyqty oıyn bolary sózsiz...
Al bul oıyn 9 naýryz kúni saǵat 14:00-de elordamyzdaǵy «Astana-Arena» stadıonynda ótedi. Aıtpaqshy, jankúıerlerdiń esine, kirý tegin kórinedi...
