Maýsymda shahmattan jahandyq áıelder festıvali ótedi
NUR-SULTAN. QazAqparat – 11 maýsym kúni «The Queens’ Festival» shahmattan jahandyq áıelder onlaın festıvali bastalady. Onyń aıasynda shahmattan qurlyqtyq jáne jahandyq áıelder onlaın-týrnırleri men úıretýge arnalǵan is-sharalar serııasy ótedi, dep habarlaıdy QazAqparat Qazaqstan shahmat federatsııasynyń baspasóz qyzmetine silteme jasap.
FIDE (Halyqaralyq shahmat federatsııasy) Áıelder shahmat komıssııasy men FIDE is-sharalar komıssııasymen birlesip, Azııa shahmat federatsııasy, Afrıka shahmat konfederatsııasy, Eýropalyq shahmat odaǵy jáne Amerıka shahmat konfederatsııasynyń qoldaýymen uıymdastyrylǵan biregeı, jan-jaqty is-shara, shahmat ómiriniń barlyq aspektilerine áıelderdi qatystyrý jáne álemde áıelderdiń myqty shahmat qoǵamdastyǵyn damytýdy kózdeıdi.
Netflix arnasynda shyqqan «Patshaıymnyń gambıti» (Queen's Gambit) serıalynyń tanymaldyǵy men jetistigine negizdelgen bul shara dúnıejúzindegi áıel shahmatshylardy, shahmat oıynyń uıymdastyrýshylardy, tóreshilerdi, yqpal etýshilerdi, kóshbasshylardy jáne túrli deńgeılerdegi shahmatshylardy biriktirip, kótermeleıdi.
Azııa, Amerıka, Afrıka jáne Eýropa shahmatshylary «Queens Finals» jeke jáne komandalyq fınalǵa ótý múmkindigi úshin aldymen onlaın blıts kvalıfıkatsııalyq týrnırde baq synaıdy.
Barlyq qatysqysy keletinder Qazaqstan shahmat federatsııasynyń office@kazchess.kz elektrondy poshtasyna 2021 jyldyń 5 maýsymyna deıin ótinim tastaı alady.
Qatysý jarnasy – 10 dollar.
Festıval aıasynda FIDE basqarýshy dırektory Dana Reıznıetse-Ozala men qazaqstandyq grossmeıster Dınara Sádýaqasova jáne basqa da arnaıy qonaqtardyń qatysýymen semınarlar men túrli is-sharalar ótedi.
