Maýsymda azyq-túliktiń álemdik baǵasy shamamen 34 paıyz ósti - Asqar Mamın

NUR-SULTAN. QazAqparat – Maýsym aıynyń qorytyndysynda azyq-túliktiń álemdik baǵasy shamamen 34 paıyzǵa ósti. Bul týraly Úkimettiń keńeıtilgen otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Bıylǵy birinshi jartyjyldyqta Úkimet ekonomıkany qalpyna keltirý jáne ony ornyqty ósý serpinine shyǵarý, halyq pen bızneske qajetti qoldaý kórsetý jumystaryn jalǵastyrdy. Qazirgi jańa bolmysta ekonomıkany yntalandyrýdyń barlyq quraldaryn keshendi túrde paıdalaný ekonomıkalyq belsendilikti qoldaýǵa múmkindik berdi. Halyqaralyq uıymdar bıyl álemdik ekonomıkanyń qalpyna kelý qarqyny joǵary bolady dep josparlap otyr. Osy turǵyda taýar naryqtaryndaǵy baǵalar ósýde», - dedi Asqar Mamın.

Onyń dereginshe, jyl basynan beri munaı 44 paıyzǵa qymbattap, 1 barreli 73 dollarǵa deıin jetti. Metall baǵasy da ósti.

«Jahandyq jáne óńirlik óndiris pen saýda baılanystyń buzylýyna klımattyq jaǵdaılardyń ózgerýine baılanysty sońǵy 10 jylda azyq-túliktiń álemdik baǵasy neǵurlym joǵary qarqynmen ósýde. Maýsym aıynyń qortyndysy boıynsha azyq-túliktiń álemdik baǵasy shamamen 34 paıyzǵa ósti. Álemdik ınflıatsııanyń ósýi, qarjy naryqtarynda turaqsyzdyq, sondaı-aq vırýstyń jańa mýtatsııalarynyń paıda bolýy jaǵdaıynda jahandyq ekonomıkada belgisizdik faktorlary joǵary deńgeıde qalyp otyr», - dedi Úkimet basshysy.