Maýsymda Astana Operada ótetin qoıylymdar men kontsertter
NUR-SULTAN. QazAqparat - A.Adannyń «Jızel» baletiniń keremet premerasynan soń, jazdyń alǵashqy aıynda «Astana Opera» teatrynda elorda turǵyndary men qonaqtarynyń nazaryna túrli oıyn-saýyq spektaklderi men kontsertteri usynylmaq. Kórnekti qazaqstandyq ári álem klassıkteriniń jaýharlary Úlken zal afıshasynyń sánin keltirmek, dep habarlaıdy QazAqparat teatrdyń baspasóz qyzmetine silteme jasap.
22 maýsym kúni saǵat 18:00-de M.Áýezovtiń lıbrettosyna jazylǵan A.Jubanov pen L.Hamıdıdiń áıgili «Abaı» ulttyq operasy sahnalanady.
«Astana Opera» sımfonııalyq orkestri men hory qoıýshy dırıjer, teatrdyń bas dırıjeri, Qazaqstannyń eńbek sińirgen qaıratkeri, QR Memlekettik syılyǵynyń laýreaty Alan Bóribaevtyń jetekshiligimen óner kórsetpek. Qoıýshy rejısser - Djankarlo del Monako. Bas hormeıster - Qazaqstannyń eńbek sińirgen qaıratkeri Erjan Dáýitov, qoıýshy dırıjerdiń assıstenti - Rýslan Baımýrzın, qoıýshy rejısserdiń assıstenti - Erenbaq Toıkenov.
Spektakldegi basty partııalardy «Astana Opera» jetekshi solısteri, Qazaqstannyń eńbek sińirgen qaıratkerleri usynady: Abaı - Janat Shybyqbaev, Ajar - Saltanat Ahmetova, Aıdar - Nurlan Bekmuhambetov. Syrttannyń rólin teatrdyń jetekshi solısi, Armenııanyń Halyq ártisi Barseg Týmanıan oryndaıdy, Jırenshe - Talǵat Ǵaleev (debıýt), Evgenıı Chaınıkov, Ázim - Beıimbet Tańaryqov, Qarlyǵash - Tatıana Vıtsınskaıa, Kókbaı - Erjan Saıpov, Narymbet - Ramzat Balakıshıev, Mes - Shyńǵys Rasylhan.
26 maýsymda saǵat 19.00-de ǵalamat Gala-balet keshi ótedi. Eki bólimnen turatyn aýqymdy baǵdarlamaǵa «Astana Opera» balet trýpasynyń kórkemdik jetekshisi, Reseıdiń Halyq ártisi Altynaı Asylmuratova M.Petıpanyń horeografııasyndaǵy klassıkalyq baletterden pa-de-de jáne sahnalyq kórinister, sonyń ishinde J.Korallı, J.Perronyń horeografııasyndaǵy A.Adannyń «Jızel» baletinen Pa-de-de, L.Mınkýstyń «Don Kıhot» baletinen Syǵan bıi (E.Sherstnevanyń redaktsııasy) jáne Gran-pa, «Baıaderka» baletinen Úndi bıi, R.Drıgonyń «Arlekınada» baletinen Pa-de-de, A.Adannyń «Korsar» baletinen Pa-de-de engizgen.
Kórermen qaýymǵa XX ǵasyrdaǵy kórnekti horeograftardyń baletterinen dýetter usynylmaq: R.Petıdiń J.Bıze mýzykasyna «Karmen» jáne M.Jarr mýzykasyna «Parıj Qudaı Anasynyń sobory», sondaı-aq N.Rımskıı-Korsakov mýzykasyna M.Fokınniń «Sheherazada» (A.Lıepanyń rekonstrýktsııasy) baletterinen dýetter qoıylady. Zamanaýı otandyq ári sheteldik horeograftar men sazgerlerdiń, atap aıtqanda K.Zverevanyń horeografııasyndaǵy A.Raıymqulovanyń «Zaman tynysy» baletinen dýet jáne Dj.Ýılıamstyń «Joǵalǵan jumaq», A.Sadyqovanyń horeografııasyndaǵy Q.Shildebaevtyń «Tamyr» syndy ozyq týyndylary oryndalatyn bolady.
Teatrdyń Úlken zaly sahnasynda «Astana Opera» jetekshi solısteri - Qazaqstannyń eńbek sińirgen qaıratkerleri Baqtııar Adamjan, Áıgerim Beketaeva, Ánel Rústemova, Gaýhar Ýsına, Rústem Seıitbekov; Erkin Rahmatýllaev, Oljas Tarlanov, solıster Serik Naqyspekov, Anastasııa Zaklınskaıa, Daler Zaparov, balet ártisteri Jánibek Imanqulov, Shuǵyla Ádephan, Natalıa Kondıa, Nazıra Zaetova, Bostan Qojabekov, Danııar Jumataev, Ǵalymjan Nurmuhamet, Sultanbek Ǵumar jáne t.b. óner kórsetedi. Kontsert «Astana Opera» sımfonııalyq orkestriniń súıemeldeýimen ótedi, dırıjeri - Arman Orazǵalıev.
29 maýsym kúni saǵat 18.00-de tyńdarmandarǵa Djoakkıno Rossınıdiń áıgili «Sevıldik shashtaraz» kúldirgi operasy usynylatyn bolady. Spektakldiń qoıýshy dırıjeri - Qazaqstannyń eńbek sińirgen qaıratkeri Alan Bóribaev, dırıjer - Rýslan Baımýrzın. Qoıýshy rejısser - Alfonso Antonıotstsı, bas hormeıster - Qazaqstannyń eńbek sińirgen qaıratkeri Erjan Dáýitov, rejısserdiń assıstenti - Erenbaq Toıkenov.
Fıgaro partııasyn teatrdyń jetekshi solısi, Qazaqstannyń eńbek sińirgen qaıratkeri, QR Memlekettik syılyǵynyń ıegeri Súndet Baıǵojın usynady, Almavıva - Qazaqstannyń eńbek sińirgen qaıratkeri Jan Tapın, Rozına - «Qurmet» ordeniniń kavaleri Aızada Qaponova, Qazaqstannyń eńbek sińirgen qaıratkeri Saltanat Ahmetova, Bartolo - Evgenıı Shagarov, Bazılıo - Armenııanyń Halyq ártisi Barseg Týmanıan, Berta - Gúljanat Sapaqova, Tatıana Vıtsınskaıa, Fıorello - Erjan Saıpov, Ofıtser - Shyńǵys Rasylhan.
