Maýsymaralyq kezeńde kókónis baǵasyn turaqtandyrý úshin «Almaty» ÁKK taýarlyq-baǵalyq ınterventsııa jasaýǵa daıyn

Baǵany turaqtandyrý baǵdarlamasynyń tujyrymdamasyna sáıkes, saqtaýǵa qoıylǵan ónimder qalada kókónis baǵasy negizsiz, kúrt ósip ketken jaǵdaıda tómen baǵamen saýdaǵa shyǵarylmaq. Bul ádis taýarlyq-baǵalyq ınterventsııa degen atpen belgili. Arzan kókónis Korporatsııanyń óz saýda júıesi arqyly da kelisim boıynsha qaladaǵy eń tanymal saýda jelileri arqyly da satylymǵa shyǵarylatyn bolady.

Baǵany turaqtandyrý baǵdarlamasyn iske asyrý úshin «Almaty» ÁKK jyl basynda Almaty, Ońtústik Qazaqstan jáne Jambyl oblysynyń aýyl sharýashylyq taýar óndirýshilerimen quny 1,8 mlrd.teńge bolatyn 26 myń tonnadan astam kókónis ónimderin jetkizý týraly kelisimderge qol qoıǵan. Negizinen bul kartop, jýa, sábiz, qyryqqabat syndy turǵyndar eń jıi tutynatyn ónim túrleri. Kelisimsharttar negizinen fıýcherstik ádispen jasalǵan, ıaǵnı Korporatsııa kóktemde aldyn-ala tólem jasap, ónim óndirýshi kókónisti kúzde jetkizip beretin bolyp ýaǵdalasty. Kelisimsharttar boıynsha kókónis quny qazirgi qaladaǵy ortasha baǵalardan eleýli tómen. Qazir egin-terim ýaqyty ekenin jáne kókónis baǵasy óziniń eń tómengi shegine jetkenin eskersek, turaqtandyrý qoryna jınaqtalǵan kókónis quny basqa shyǵyndardy eskergenniń ózinde maýsymaralyq kezeńde básekege qabiletti bolady dep kútilýde.

Qazirgi ýaqytta taýar óndirýshiler óz mindetterin oryndaýǵa kiristi jáne ósirgen ónimderin Korporatsııa kórsetken qoımalarǵa jetkizýdi bastady. Kókónis «Almaty» ÁKK kelisim-shart jasaǵan, qajetti qural-jabdyqtarmen jabdyqtalǵan qoımalarǵa jetkizilýde. Bıylǵy maýsymda Korporatsııa qala mańynda ornalasqan 8 kókónis qoımasymen taýardy jaýapty saqtaý týraly kelisim jasady. Kelesi jyly «Almaty» ÁKK qurylysyna úlesker retinde qatysyp otyrǵan, syıymdylyǵy 36 myń tonnalyq «Gega» atty logıstıkalyq ortalyq paıdalanýǵa beriledi dep josparlanyp otyr.