Maýsymaralyq kezeńde adamdardyń 80 paıyzynda dárýmen jetispeıdi – dáriger

ALMATY. QazAqparat - Almaty qalasynyń Óńirlik kommýnıkatsııalar qyzmetinde ótken brıfıngte №26 emhananyń gerontolog dárigeri Svetlana Fazyljanova dárýmen jetispeýshiliginiń sebepteri, belgileri jáne avıtamınoz kezinde kezdesetin aýrýlar týraly aıtty, dep habarlaıdy QazAqparat tilshisi.

Dárigerdiń aıtýynsha, jyl saıyn maýsymaralyq kezeńde adamdardyń 60-80%-y dárýmen jetispeýshigin sezinedi. Atalǵan aýrýǵa jetkiliksiz nazar aýdarý jáne ony elemeý kóbinese jaǵymsyz saldarǵa jáne jaǵdaıdyń nasharlaýyna ákeledi.
«Ár adamnyń aǵzasyna jeke qaraý kerek jáne ony dárýmenderdi tańdaǵan kezde de eskergen jón, mıneraldardy zattar men olardyń kólemi de soǵan qaraı taǵaıyndalady. Ártúrli patologııalarmen jáne aýyrǵan aýrýlardyń saldarynan dárýmen jetispeýshiligi birneshe ese artýy múmkin. Aıta keterligi, sýyq tıgen kezde aspırın qabyldaý aǵzadan S dárýmeniniń bóliný jyldamdyǵyn 3 esege arttyrady», - deıdi Svetlana Fazyljanova.
Gerontolog dárigeri avıtamınozdy qandaı belgiler arqyly anyqtaýǵa bolatynyn atap ótti.
«Máselen, buryn janǵa rahat syılaıtyn zattar men áreketterge apatııa jáne qyzyǵýshylyqty joǵaltý, sýyq tııý men murynnyń bitýi,bir nemese birneshe sozylmaly aýrýlardyń órshýi, túngi 2:30 jáne 3:30 ýaqyt aralyǵynda jıi oıaný, teridegi bezeýdiń paıda bolýy nemese teriniń shamadan tys qurǵaýy, shashtyń synǵyshtyǵy jáne tyrnaqtardyń qatparlanýy, ish qatý, gastrıt túrinde asqazan-ishek joldarynyń buzylýynyń paıda bolýy, qyzylıektiń qanaýy, bas aýrýynyń jıileýi, qulaqtyń shýy jáne bas aınalý. Bul belgilerdiń bolýy progressıvti kóktemgi avıtamınozmen jedel kúresý qajettigin kórsetedi»,- deıdi spıker.
Sondaı-aq, dáriger kóktemgi avıtamınozben tıimdi kúresý úshin qazirgi ýaqytta aǵzaǵa qandaı dárýmender nemese olardyń kombınatsııasy qajet ekenin anyqtaý mańyzdy ekenin jetkizdi.
«Kún saıyn jetispeıtin dárýmenniń naqty mólsherin toltyrýǵa tyryspaý kerek. Onyń ornyna dárigerler qajetti dárýmender men mıneraldardyń ortasha mólsherin birneshe kún nemese apta ishinde alýǵa keńes beredi», - dep túsindirdi spıker.
Dárýmen tapshylyǵynyń aldyn alýdyń negizgi qaǵıdasy – durys jáne teńdestirilgen dıetany saqtaý. Sonymen qatar, dárýmen jetispeýshiligi kezinde taza aýada jıi serýendeý jáne turaqty sporttyq jattyǵýlar kómektesedi.
Dáriger tamaqtanýdyń negizgi erejelerin eleýsiz qaldyrmaýǵa jáne tamaqtaný ratsıonyna jańa syǵylǵan shyryndardy, freshterdi, kókónisterdiń, jemisterdiń jáne kók shópterdiń ártúrliligin qosýdy usynady.
Sondaı-aq, maman dárýmenniń jetispeýin elemeý medıtsınalyq aralasýdy qajet etetin aýyr aýrýlarǵa, tipti aýrýhanaǵa jatqyzýǵa deıin aparatynyn eske saldy.