Maýsym-shilde aılarynda Astanada menıngıttiń 80 jaǵdaıy tirkeldi - J. Bekshın
ASTANA. QazAqparat - Bıyl elimizde 550-den astam adam enterovırýstyq ınfektsııamen aýyrdy degen kúdikpen dárigerler kómegine júginip, 154 adamda dıagnoz zerthanalyq jolmen rastaldy. Bul týraly búgin Ortalyq kommýnıkatsııalar qyzmetinde ótken brıfıngte Tutynýshylar quqyǵyn qorǵaý agenttigi tóraǵasynyń mindetin atqarýshy Jandarbek Bekshın aıtty.
Brıfıngte sanıtarlyq-epıdemııalyq ahýal máseleleri, onyń ishinde elimizde turaqty epıdemıologııalyq ahýaldy qamtamasyz etý boıynsha Agenttiktiń qabyldaǵan profılaktıkalyq sharalary týraly sóz qozǵaldy.
Bas memlekettik sanıtarlyq dárigerdiń aıtýynsha, qazir enterevırýstyq ınfektsııalarmen syrqattanýshylyq jaǵdaıy kóbeıip tur.
"2013 jyly respýblıka boıynsha 900 adam dárigerlerge júginip, 264 adamda dıagnoz zerthanalyq jaǵdaıda rastalǵan. Syrqattanýshylyq Atyraý, Qostanaı jáne Qyzylorda oblystarynan basqa barlyq óńirlerde tirkelgen. Al bıyl 552 adam dárigerge qaralyp, olardyń 154-iniń dıagnozy zerthanada rastalǵan. Aýrý elimizdiń 8 óńirinde (Aqmola, Shyǵys Qazaqstan, Mańǵystaý, Pavlodar, Soltústik Qazaqstan, Qaraǵandy oblystarynda jáne Almaty men Astana qalalarynda) tirkeldi " , - dep atap ótti J. Bekshın.
Onyń aıtýynsha, bıylǵy maýsym-shilde aılarynda Astana qalasynda zerthanalyq rastalǵan enterovırýstyq berishti menıngıttiń 80 jaǵdaıy, Qaraǵandy oblysynda 49 jaǵdaıy tirkelgen.
"Agenttiktiń aýmaqtyq departamentteri enterovırýstyq ınfektsııanyń taralýynyń aldyn alýǵa baǵyttalǵan profılaktıkalyq jáne epıdemııaǵa qarsy jumys júrgizýde", - deıdi J. Bekshın.
Onyń aıtýynsha, qorshaǵan orta obektilerin - ashyq sý qoımalarynyń, júzý basseınderiniń, sýburqaqtardyń sýyn, aǵyndy sýdy monıtorıngileý kúsheıtildi.
Sondaı-aq, bas memlekettik sanıtarlyq dáriger ata-analarǵa balalaryn jeke gıgıena erejelerin saqtaýǵa, shomylýdan bas tartýǵa, sapasy kúmándi sýdy ishpeýge, adamdar jappaı jınalatyn jerlerge barmaýǵa, sýyq tııýden saqtanýǵa daǵdylanýǵa keńes berdi.
