Maýsym bastalǵaly «Astana Bike» jobasyna 3 myńǵa jýyq adam qosyldy
ASTANA. QazAqparat - Elordada sáýir aıynyń ortasynda «Astana Bike» veloprokat maýsymy bastaldy. Velosıpedpen jol júrýge qyzyǵýshylyq tanytatyn elordalyqtar sany kún saıyn artyp keledi. Bıyl qosylǵan júıeni paıdalanýshylar sany 2998 adamdy qurady. Al ekologııalyq kólik túrin unatatyndarǵa qolaıly bolýy úshin jaqynda «7 Kontınent» bıznes ortalyǵynda Astana Bike kartalaryn satatyn qosymsha pýnkt ashyldy.
Kún saıyn «Mega Astana» saýda, oıyn-saýyq ortalyǵynda saǵat 10:00 - 21:30 jáne «7 Kontınent» BO saǵat 10.00-20.00 bir maýsymǵa abonement satyp alýǵa nemese balansty tolyqtyrýǵa bolady. Qazirgi kezde prokatty paıdalanǵan adamdar sany 114 myńnan asyp, 262 myń km jýyq jol júrilgen.
Aıta keteıik, paıdalanýshylarǵa yńǵaıly bolýy úshin onlaın-tólem júıesi, mobıldi bankıng (Halyk Bank) jáne Android jáne IOS negizinde ázirlengen mobıldi qosymsha jumys isteıdi. Osylaısha, paıdalanýshylar, stantsııalar júktemesin jáne ornalasqan ornyn qaraı alady. Maýsym bastalǵaly SMS arqyly prokatqa alýdyń 93 jaǵdaıy tirkelgen.
Qazirgi kezde Astanada 144 velostantsııa bar. Kúıshi Dına jáne Táýelsizdik dańǵyly qıylysynda ornalasqan stantsııa kóppáterli turǵyn úı keshenine elektr energııasyn tartý jumystaryna baılanysty alynyp tastaldy. Turǵyndardyń shaǵymdanýyna baılanysty «Nursaıa-2» turǵyn úı kesheniniń janyndaǵy prokat ta jumys istemeıdi. «Araı» parkinde velosıpedter kóp paıdalanylmaıdy, sondyqtan beket jabyldy. «Dýman» qonaq úıi men «Trıýmf Astany» TK janyndaǵy prokat tehnıkalyq sebepterge baılanysty joıyldy, «Astana Mall» SOO janynda da velosıpedter qoıylmaǵan.
Eske salaıyq, prokat qyzmetin únemdi paıdalaný úshin stantsııalar bir-birine jaqyn ornalasqan, olardyń arasyndaǵy qashyqtyq 300-500 metrdi quraıdy.
