Maýsym aıynda jumyssyzdyq deńgeıi 0,1%-ǵa tómendedi - Statıstıka agenttigi

ASTANA. QazAqparat - Qazaqstandaǵy jumyssyzdyq deńgeıi 2014 jyldyń maýsymynda mamyrmen salystyrǵanda 0,1%-ǵa azaıdy, dep habarlady QR Statıstıka agenttiginde.

2014 jylǵy maýsymda jumyssyzdar sany, baǵalaý boıynsha 459,8 myń adamdy, jumyssyzdyq deńgeıi 5,0% qurady. Agenttiktiń málimetinshe, mamyrda jumyssyzdyq kórsetkishi 5,1%-dy quraǵan bolatyn, osylaısha maýsymda 0,1%-ǵa tómendeý tirkelgen.

Statıstıka agenttiginiń málimetinshe, Qazaqstan Respýblıkasy Eńbek jáne halyqty áleýmettik qorǵaý mınıstrliginiń jumyspen qamtý organdarynda 2014 jylǵy maýsym aıynyń sońyna 55,6 myń adam resmı tirkelgen. Tirkelgen jumyssyzdar úlesi ekonomıkalyq turǵydan belsendi halyqtyń 0,6%-yn, 2013 jylǵy maýsymda - 0,7%-yn qurady.

Respýblıka ekonomıkasynda 2014 jylǵy maýsymda, baǵalaý boıynsha 8,6 mln adam jumyspen qamtyldy. Ótken jylǵy sáıkes kezeńge qaraǵanda olardyń sany 63,1 myń adamǵa nemese 0,7%-ǵa kóbeıdi. Jaldamaly qyzmetkerlerdiń sany atalǵan kezeńde 6,0 mln adamdy, jumyspen qamtylǵandardyń jalpy sanynyń 69,8% qurady.