Maýsym aıynda Ulttyq banktiń taza halyqaralyq rezervteri 5,8 paıyzǵa tómendedi
ALMATY. Shildeniń 14-i. QazAqparat /Erlik Erjanuly/ - Maýsym aıynda eldiń halyqaralyq rezervteri Ulttyq qordyń shetel valıýtasyndaǵy aktıvterin qosa alǵanda 2,8 paıyzǵa tómendedi.
Ony Ulttyq bank tóraǵasy Grıgorıı Marchenko búgin Almatyda ótkizgen baspasóz máslıhatynda aıtty.
Ekinshi toqsannyń sońǵy aıynda Ulttyq banktiń taza halyqaralyq rezervteri 26,1 mıllıard dollarǵa deıin nemese 5,8 paıyzǵa tómendedi. Taza valıýta qorlary - 6,2 paıyzǵa, altyndaǵy aktıvter 2,2 paıyzǵa azaıdy.
Bas bankırdiń aıtýynsha, maýsymda aqsha bazasy 8,7 paıyzǵa ulǵaıyp, 2 738,4 mıllıard teńgeni qurady. Tar aqsha bazasy, ıaǵnı ekinshi deńgeıdegi bankterdiń Ulttyq banktegi merzimdi depozıtterin eseptemegendegi aqsha bazasy 2 218,4 mıllıard teńge boldy. Mamyrda aqsha massasy bank júıesindegi ishki aktıvteriniń ósýi sebebinen 0,5 paıyzǵa ósken edi. Al aınalystaǵy qolma-qol aqshadaǵy ósim 3,4 paıyz boldy. Depozıtterdiń ósýimen salystyrǵanda aınalystaǵy qolma-qol aqsha kólemi ósýiniń basym qarqyny aqsha massasynyń qurylymyndaǵy depozıtter úlesiniń sáýirdegi 88 paıyzdan mamyrda 87,7 paıyzǵa deıin tómendeýine sebepshi boldy.
