Maýsym aıynda teńge baǵamy nyǵaıdy - Erbolat Dosaev

NUR-SULTAN. QazAqparat –Ulttyq Bank tóraǵasy Erbolat Dosaev Úkimettiń keńeıtilgen otyrysynda valıýta naryǵyndaǵy ahýalǵa toqtaldy, dep habarlaıdy QazAqparat tilshisi.

Ulttyq bank tóraǵasynyń aıtýynsha, búkil álemde ekonomıkalyq ósimniń keıinge shegerýli saldarynan qazir serpilister bolyp jatyr. Bul óz kezeginde Qazaqstannyń makroekonomıkasynda shetel valıýtasyna degen suranysty arttyryp, teńgege birshama qysym túsirip otyr. Degenmen, maýsym aıynda munaı baǵasynyń nyǵaıýy teńgeniń baǵamyna da oń áser etken.

«Birinshi jartyjyldyqta valıýta naryǵy syrtqy naryqtardyń qubylmalylyǵyna qaramastan aıtarlyqtaı turaqty boldy. Maýsym aıynyń qorytyndysy boıynsha munaı baǵasynyń 8,4%-ǵa ósýi teńge baǵamyn 0,9%-ǵa nemese 425 teńgege deıin nyǵatty»,- dedi Ulttyq bank basshysy.

Erbolat Dosaevtyń aıtýynsha, ımportqa degen suranys teńge baǵamyna qysym kórsetýin jalǵastyra bermek.

«Ekinshi toqsannan bastap iskerlik belsendilikti qalpyna keltirý, ımportqa keıinge qaldyrylǵan suranysty iske asyrý jáne sheteldik ınvestordyń dıvıdendtik tólemderi esebinen suranystyń artýy baıqalady. Atalǵan faktorlardy eskersek, shetel valıýtasyna ósip kele jatqan suranys pen AQSh dollarynyń bıyldyń ózinde 2,8 paıyzǵa jahandyq nyǵaıýy teńgege eleýli qysym kórsetýin jalǵastyryp otyr»- dedi Ulttyq bank tóraǵasy.