Maýsym aıynda otandyq óndirýshiler ósimdik maıyn 5,4% qymbattatqan

NUR-SULTAN. QazAqparat – Ótken maýsym aıynda ósimdik maıyn óndirýshi qazaqstandyq kásiporyndar baǵany 5,4%, shaıǵa - 2,8% qymbattatqan. QazAqparat bul týraly QR Strategııalyq josparlaý jáne reformalar agenttigi Ulttyq statıstıka bıýrosyna silteme jasap habarlaıdy.

Bıylǵy maýsym aıynda onyń aldyńǵy mamyrmen salystyrǵanda otandyq ónerkásip ónimderin óndirýshi kásiporyndardyń baǵasy 3,1% joǵarylaǵan.

Atap aıtqanda, ótken aıda azyq-túlik ónimderin óndirýshi otandyq kásiporyndarda baǵa ósimdik maıyna - 5,4%, shaıǵa - 2,8%, qus etine - 1,7%, mal etine, jarmalarǵa jáne nanǵa - 0,7%-dan, kúrishke - 0,5%, sút ónimderine 0,3% joǵarylady. Kerisinshe, qara bıdaı unyna - 3,1%, qantqa - 0,5%, makaron ónimderine 0,3% tómendegen.

Baǵa elektr energııasymen jáne sýmen jabdyqtaýda elektr energııasy 0,7% qymbattady.

Sondaı-aq taý-ken óndirý salasynda baǵanyń metall kenderine - 6,3%, munaıǵa - 3%, kómirge - 0,8%, tabıǵı gazǵa 0,2% joǵarylaýy baıqaldy.

Óńdeý salasynda baǵa qara metaldar ılegine - 10,7%, qorǵasynǵa - 9,2%, mysqa - 8,6%, myryshqa - 4,6%, asyl metaldarǵa - 4,4%, alıýmınııge - 4%, ferroqorytpalarǵa 3,4% kóterildi. Munaı ónimderinen benzınge - 4%, mazýtqa - 0,8%, dızel otynyna 0,3% qymbattady. Suıytylǵan propan jáne býtanǵa 0,6% arzandady.