Maýsym aıynda Qazaqstanda kóp qabatty úılerdiń terezesinen 5 bala qulady
ASTANA. QazAqparat - QR ІІM Tótenshe jaǵdaılar komıteti balalardyń qatysýymen jazataıym oqıǵalardyń ósýine baılanysty dabyl qaǵyp otyr.
«Maýsymnyń tek alǵashqy 7 kúninde kóp qabatty úılerdiń terezesinen kishkentaı balalardyń qulaýynyń 5 oqıǵasy tirkeldi. Onyń ishinde ekeýi Astanada oryn alsa, Taldyqorǵan, Qostanaı jáne Temirtaý qalalarynyń árqaısysynda bir oqıǵadan boldy. Balalar túrli dene jaraqattarymen medıtsınalyq mekemelerge jatqyzyldy. Jalpy, jyl basynan beri kóp qabatty úılerden qulaǵandyǵy jóninde 20 oqıǵa tirkeldi»,-delingen habarlamada.
TJ jónindegi komıtet ókilderi atalǵan qaıǵyly oqıǵalar ata-analardyń tıisti deńgeıde balalaryn qaramaýynan bolyp otyrǵanyn aıtýda. Osy rette qutqarýshylar ata-analardy sábılerdi jiti nazarda ustap, olardy qaraýsyz qaldyrmaýǵa shaqyrdy.
Qutqarýshylar páterde kishkentaı balalar bolǵan jaǵdaıda terezelerdi ashyq qaldyrmaý jaıynda, terezelerdiń aldynan jıhazdardyń barlyq túrler alyp tastaý, balany qaraýsyz qaldyrmaý týraly eskertý jasaýda. Osyǵan baılanysty TJK mamandary terezeniń aıqara ashylýyna jol bermeıtin arnaıy bekitkishterdi ornatý usynysyn jasap otyr.
