Maýsym aıynda Qazaqstan halqynyń sany 17 mln.-nan asty
ASTANA. 9 shilde. QazAqparat - 2013 jyldyń 1 maýsymyndaǵy jaǵdaı boıynsha, Qazaqstan halqynyń sany 17 mln. 10,6 myń adamdy qurady.
Bul rette, jyl basynan beri halyq sany 0,6 paıyzǵa ósti.
QR Statıstıka agenttiginiń málimetterine sáıkes, Ońtústik Qazaqstan oblysy halqynyń sany jyl basynan beri 25 myńǵa ósip, 2,7 mln. adamǵa deıin, Almaty oblysynda 16,5 myńǵa ósip, 1,963 mln.-ǵa deıin, Mańǵystaý oblysynda 8,1 myńǵa artyp, 575,9 myń adamǵa deıin jetken. Al Astana halqynyń sany qańtar-mamyr aılarynda 12 myń adamǵa artyp (7,2 myń - tabıǵı, 4,8 myń - mıgratsııalyq ósim) 790,2 myńǵa deıin, Almatyda 8,8 myńǵa (sáıkesinshe, 6,5 myń jáne 2,3 myń adam) kóbeıip, 1 mln. 484,2 myńǵa deıin ósken.
Sonymen bir mezgilde, Soltústik Qazaqstan oblysy halqynyń sany 1051 adamǵa kemip, 578,4 myńǵa deıin tómendedi.
