Maýsym aıynda ınflıatsııa qarqyny baıaýlady
Ulttyq statıstıka bıýrosy azyq-túlikke jatpaıtyn taýarlar baǵasy – 0,7%, aqyly qyzmetter – 0,6%, azyq-túlik taýarlary 0,2% óskenin habarlady.
Azyq-túlikke jatpaıtyn taýarlardyń ishinde maýsym aıynda jıhaz ben úıge qajetti zattar baǵasy 2,6% ósti: shabadandar, jol sómkeleri – 1,4%, velosıpedter – 1,2%, jeke qoldanatyn zattar baǵasy 1% qymbattady. Mamyrmen salystyrǵanda maýsymda qurylys materıaldary – 0,8%, kıim jáne aıaq kıim, farmatsevtıka ónimderi – árqaısysy 0,7%-dan ósti. Benzın AI-95/96 – 1,1%, ballondaǵy suıytylǵan gaz 0,7% qymbattady.
Áýe jolaýshylar kóligi qyzmetteri 9,6%, keshendi demalystardy uıymdastyrý – 8,8%, sanatorııler qyzmetteri – 6%, turǵyn úı-jaılardy jóndeý jáne qyzmet kórsetý boıynsha qyzmetterge – 1,6%, qoǵamdyq tamaqtandyrý qyzmetine – 1,4%, densaýlyq saqtaý qyzmetine 0,9% ósti.
Azyq-túlik taýarlary arasynda kartop baǵasy 9,9%, júzim – 4%, lımon – 3,9%, alma – 3,1% ósti. Baǵanyń ósýi mıneraldy jáne aýyz sýǵa, salqyndatylǵan sýsyndarǵa 2,4%-dan, jemis jáne kókónis shyryndaryna 1,8% baıqaldy. Banan – 10,6%, jańa jınalǵan kókónis – 8,8%, jumyrtqa – 5,9%, kúnbaǵys maıy – 4,2%, qaraqumyq jarmasy – 4,1% arzandady.
Óńirler arasynda eń joǵary aılyq ınflıatsııa Soltústik Qazaqstan jáne Mańǵystaý oblystarynda – 0,9%-dan (ortasha respýblıkalyq deńgeıden 0,4 p.t. joǵary), eń tómengi – Aqtóbe oblysynda 0,1% tirkeldi. Tutyný baǵalarynyń ındeksi bir aıda Shymkent qalasynda 100% boldy.
Óńirler boıynsha eń joǵary azyq-túlik taýarlarynyń baǵalary Ulytaý oblysynda – 1,3%, azyq-túlik emes taýarlary Astana qalasynda – 1,3%, aqyly qyzmetter Soltústik Qazaqstan oblysynda 1,4% ósti.
2023 jylǵy maýsymda jyldyq mánde ınflıatsııa deńgeıi 14,6% bolǵan. Azyq-túlik taýarlarynyń baǵasy 14,6%, azyq-túlikke jatpaıtyn taýarlar 15,8%, aqyly qyzmetter 13,3% ósti.
2022 jylǵy maýsymmen salystyrǵanda keńse taýarlary 67,7%, qııar – 33,4%, kir sabyn – 42,1%, ydys jýýǵa arnalǵan quraldar – 41%, qantsyz qoıýlandyrylǵan sút – 42,9%, kúrish – 47,6%, kúndizgi statsıonarlyq emdeý – 40,8%, shaqpaq qant 32,2% qymbattady. Kerisinshe, jyldyq mánde qyryqqabat – 13,8%, sábiz – 9,5%, kartop – 9,1%, ý sarymsaq – 5,4%, qyzylsha 6,9% arzandady.
Inflıatsııa deńgeıin sıpattaıtyn tutyný baǵalary ındeksiniń kórsetkishi aı saıyn esepteledi. Baqylaý qyzmetter men taýarlardyń tarıfteri men baǵalary – barlyǵy 508 pozıtsııa boıynsha júrgiziledi. Baǵalardy tirkeý barlyq oblys ortalyǵynda, astanada jáne qalalar men aýdan ortalyqtarynyń belgili bir sheńberinde ártúrli menshik nysanyndaǵy saýda jáne qyzmet kórsetý salasy kásiporyndarynyń iriktemeli jelisi boıynsha júrgiziledi.
2023 jylǵy qańtardan bastap, tutyný baǵalarynyń ındeksin eseptegende, azyq-túlik taýarlarynyń úlesi – 41,8%, azyq-túlikke jatpaıtyn taýarlar – 29,6%, aqyly qyzmetter 28,6% bolǵan.