Maýsym aıynda elimizdegi ınflıatsııa deńgeıi 0,3 paıyzdy qurady
ASTANA. 2 shilde. QazAqparat - 2012 jylǵy maýsym aıynda elimizdegi ınflıatsııa deńgeıi 0,3 paıyzdy qurady. Bul týraly Statıstıka agenttiginen habarlandy.
Atap aıtqanda, azyq-túlik jáne azyq-túlik emes taýarlaryna baǵa ótken aıda 0,2 paıyzǵa, aqyly qyzmetterge - 0,4 paıyzǵa ósken. Ótken aıda baǵanyń tómendeýi jumyrtqaǵa 7,1 paıyz, jarmalarǵa - 3,3 paıyz, jańa jınalǵan kókónisterge - 1,6 paıyz, unǵa - 0,9 paıyzǵa, maı jáne toń maıǵa, qantqa - 0,6 paıyzdan, jańa saýylǵan sútke, kúrishke - 0,2 paıyzdan tirkeldi. Baǵanyń joǵarylaýy kartopqa 7,1 paıyz, et jáne qus etine, alkogolsiz sýsyndarǵa - 1 paıyz, jemisterge - 0,5, alkogoldik ishimdikterge - 0,4 paıyzǵa belgilengen.
Sonymen qatar, esepti kezeńde baǵa ósimi temeki ónimderine 1,2 paıyz, turǵyn jaılardy aǵymdaǵy kútip ustaý men jóndeýge arnalǵan materıaldarǵa - 0,8 paıyz, úı turmysyna qajetti zattarǵa - 0,4 paıyz, jeke kútimge arnalǵan taýarlarǵa - 0,3 paıyzǵa, kıim jáne aıaq kıim, farmatsevtıkalyq ónimderge - 0,2 paıyzǵa ósti. Dızel otyny 0,3, benzın - 0,2 paıyzǵa arzandady.
Budan bólek, baǵa deńgeıi mektepke deıingi bilim berý qyzmetterine 0,8 paıyz, meıramhanalar men qonaq úıler - 0,6 paıyz, densaýlyq saqtaý - 0,5 paıyzǵa, kólik, shashtarazdar men jeke qyzmet kórsetý oryndary - 0,4 paıyzǵa artqan. Turǵyn úı-kommýnaldyq qyzmetter salasynda tarıfter taratý jelileri boıynsha tasymaldanatyn gazǵa - 2,3 paıyz, ortalyqtan jylytýǵa - 1 paıyz, qoqys jınaýǵa - 0,7 paıyz, kárizge - 0,1 paıyzǵa ósti, al ystyq sýǵa 0,6 paıyzǵa tómendedi.
