Maýsym aıynda Delı - Almaty áýe reısi ashylady
NUR-SULTAN. QazAqparat - «SpiceJet» áýe kompanııasy Delı - Almaty - Delı reısin ashýdy josparlap otyr, dep habarlaıdy QazAqparat tilshisi QR IIDM Azamattyq avıatsııa komıtetiniń baspasóz qyzmetine silteme jasap.
Reısti «SpiceJet» áýe kompanııasy 10 maýsymnan bastap iske qosady.
«QR IIDM Azamattyq avıatsııa komıtetiniń tóraǵasy Talǵat Lastaev úndistandyq «SpiceJet» áýe kompanııasynyń bas menedjeri Manoj Kýmarmen kezdesti. Kezdesý barysynda eki el arasyndaǵy turaqty reıs ashý máselesi talqylandy. Áýe kompanııasyna sheteldik áýe kompanııalaryn tirkeý akkredıtatsııasy týraly kýálik berildi. Osy jyldyń 10 maýsymynan bastap «SpiceJet» Delı - Almaty - Delı baǵytynda Boıng-737 áýe kemesimen aptasyna alty reıs jasaýdy kózdep otyr», - delingen habarlamada.
Atalmysh reıstiń ashylýy eki el arasyndaǵy saýda-ekonomıkalyq qarym-qatynasty, tranzıtik áleýet pen Qazaqstandaǵy týrızmdi damytýǵa múmkindik beredi dep kútilýde.
SpiceJet - halyqaralyq saparlardy júzege asyratyn úndistandyq bıýdjettik áýe kompanııa. Іshki naryqpen birge atalmysh áýe kompanııasy Aýǵanstan, Bangladesh, Gonkong, Taıland, Shrı-Lanka, BAÁ, Oman jáne Maldıvke ushaq ushyrady.
Pákistan aldaǵy ýaqytta da áýe keńistigin jabyq kúıde ustaı bergen jaǵdaıda «SpiceJet» óziniń áýe saparlaryn Oman, Iran, Aýǵanstan jáne Ózbekstan elderi arqyly oryndaı beredi. Bir baǵytta ushý sapary 7 saǵatqa sozylady.
