Maýsym aıyna deıin dári tapshylyǵy bolmaıdy – Ajar Ǵınııat
NUR-SULTAN. QazAqparat – QR Densaýlyq saqtaý mınıstri Ajar Ǵınııat Ýkraınadan ákelinýi tıis dárilerdiń ornyn qashan toltyratyndaryn aıtty, dep habarlaıdy QazAqparat tilshisi.
«Ýkraınalyq dári jetkizýshilerdiń ornyna kimniń keletinin konkýrs, tender kórsetedi. Maýsym aıyna deıin ol málim bolady», - dedi Ajar Ǵınııat Májilis kýlýarynda.
Sondaı-aq, ol buǵan deıin Qazaqstan Ýkraınadan qandaı dári-dármek alyp kelgenin aıtty.
«10 túrli dárini emhanalarǵa satyp alamyz. Qalǵanynyń bári statsıonarlarǵa arnalǵan. Qazir ol dárilerdi uqsas dárilermen almastyrý máselesin qarap jatyrmyz. Olar keıbir dárilerdiń 40-70 paıyzyn jetkizip úlgergen edi. Sondyqtan, maýsym aıyna deıin dári bolady. Eki aıdyń ishinde qajetti dárini basqalardan satyp alamyz», - dedi mınıstr.
Buǵan deıin QR Densaýlyq saqtaý mınıstri Ýkraınadan dári ákelý kelisimsharttarynyń kúshi joıylatynyn aıtqan bolatyn.
