Maýsymnan beri Jaıyqtan bólinip qalǵan sý aıdyndarynan 121 mln shabaq qutqarylǵan

ATYRAÝ. KAZINFORM – Maýsym aıynan beri Jaıyq ózeninen bólinip qalǵan sý aıdyndarynan balyq shabaǵyn qutqarý jalǵasyp jatyr. Osy kezge deıin 121 mln shabaq qutqarylǵan. 

Balyq sharýashylyǵy komıtetiniń málimetinshe, keshe, 8 qazanda Atyraý oblysyndaǵy Sokolok kanalynan balyq shabaǵyn qutqarý júrgizilgen. Oǵan Jaıyq-Kaspıı oblysaralyq basseındik balyq sharýashylyǵy ınspektsııasynyń, «Saǵıeva» sharýa qojalyǵy men «ArnaýlyAvtoBaza» JShS qyzmetkerleri qatysqan.

«Júrgizilgen jumystyń nátjesinde 1 mln 550 myń dana balyq shabaǵy qutqarylyp, Jaıyq ózenine tiri kúıinde jiberildi. Balyq shabaqtaryn qutqarý jumystaryna 15 adam, 2 jeńil, 1 KamAZ júk kóligi tartyldy. Bıylǵy maýsym aıynan beri bólinip qalǵan sý aıdyndarynan 121 mln 165 myń 595 dana balyq shabaǵy qutqaryldy. Onyń ishinde Atyraý oblysynda 94 mln 915 myń 595, Batys Qazaqstan oblysynda 26 mln 250 myń dana balyq shabaǵy tabıǵı sý aıdynyna jiberildi», - dep habarlady balyq sharýashylyǵy komıtetinen.

Eske sala ketelik, budan buryn Atyraý oblysynda maýsym aıynan beri 89,4 mln balyq shabaǵy qutqarylǵanyn habarlaǵan bolatynbyz.