Maýsymdyq sheteldik jumysshylardy tartqan jumys berýshi qansha salyq tóleıdi – qaýly jobasy

ASTANA. KAZINFORM – «Qazaqstan Respýblıkasyna sheteldik jumys kúshin tartýǵa ruqsatty bergeni nemese uzartqany úshin alym mólsherlemelerin belgileý týraly» Úkimeti qaýlysyna ózgerister engiziledi. Qujat jobasy ashyq NQA portalynda jarııalandy. 

Engiziletin ózgeristerge baılanysty zańdy tulǵalarǵa kelesi mamandyqtar boıynsha maýsymdyq sheteldik jumyskerlerdi tartýǵa múmkindik beriledi:

- qurylys salasyndaǵy biliktiligi joq jumyskerler - jan jaqty jumyskerler;

- abattandyrý salasyndaǵy biliktiligi joq jumyskerler;

- qyzmet kórsetý salasyndaǵy biliktiligi joq jumyskerler jáne t. b.

Budan basqa, «Qazaqstan Respýblıkasyna sheteldik jumys kúshin tartýǵa ruqsatty bergeni nemese uzartqany úshin alym mólsherlemelerin belgileý týraly» Qazaqstan Respýblıkasy Úkimetiniń 2018 jylǵy 3 sáýirdegi № 157 qaýlysyna ózgeris engizý týraly» Qazaqstan Respýblıkasy Úkimetiniń qaýlysyna ózgerister engizildi, onda maýsymdyq sheteldik jumyskerlerdi tartý kezinde salyq alymdarynyń mólsherlemelerin belgileý boıynsha ózgerister kózdeledi.

Osylaısha, maýsymdyq sheteldik jumysshylardy tartý úshin jumys berýshi kelesi salyq tólemin engizýi kerek:

1. 90 kúntizbelik kúnge deıin – aılyq eseptik kórsetkishtiń 30 eselengen mólsheri;

2. 180 kúntizbelik kúnge deıin – aılyq eseptik kórsetkishtiń 60 eselengen mólsheri;

3. 270 kúntizbelik kúnge deıin – aılyq eseptik kórsetkishtiń 90 eselengen mólsheri;

4. 365 kúntizbelik kúnge deıin – aılyq eseptik kórsetkishtiń 120 eselengen mólsheri. 

Aıta ketelik 2026 jyldan bastap sheteldikterdi jumysqa tartý erejeleri jańartylady.