Maýsymdyq allergııadan tolyqtaı aıyǵýǵa bolady – maman keńesi

ASTANA. KAZINFORM – Allergolog Arman Baıdildaev allergııanyń tuqym qýalaıtyn aýrý ekenin aıtady. Ol bul týraly «Búgin LIVE» baǵdarlamasynda málimdedi.

– Allergııa – tuqym qýalaıtyn aýrý. Adamda genetıkalyq beıimdilik bolady. Eger ol bolmasa, allergııa týyndaýy múmkin emes. Oǵan qosa, allergııanyń paıda bolýyna ishek mıkroflorasynyń, jalpy ımmýnıtettiń jaǵdaıy áser etedi. Óıtkeni allergııanyń ózi – qalypty zattarǵa ımmýnıtettiń patologııalyq reaktsııasy, - deıdi dáriger.

Mamannyń aıtýynsha, sońǵy jyldary allergııanyń jıilep ketýine ekologııa áser etip jatyr.

– Keıingi kezderi allergııanyń tym jıilep ketýi, eń áýeli, ekologııaǵa baılanysty. Odan bólek, tutynyp jatqan taǵamdar da áser etedi. Sebebi qazirgi tamaqtarda túrli hımııalyq qospalar, boıaǵyshtar, hosh ıistendirgishter kóp qoldanylady. Jáne dárilik zattar, ásirese antıbıotıkti kóp tutyný da allergııa týdyrady. Antıbıotıkter ishek mıkroflorasyn buzyp, ımmýnıtetti tómendetedi. Oǵan qosa, ımmýnıtettiń vektoryn basqa jaqqa aýystyryp tastaıdy, - deıdi allergolog.

Arman Baıdildaev adamdardyń jasy ulǵaıǵan saıyn allergııanyń paıda bolý múmkindigi tómendeıtinin aıtady. Oǵan qosa, ishek mıkroflorasy saý adamdarda allergııa bolmaıdy eken. Al elimizde as qorytý júıesi durys jumys isteıtin adamdar tym az kórinedi.

– Kóbinese adamdar allergııamen jas kezinen aýyrady. Mysaly, 50-den asqan adamda allergııa paıda bolý múmkindigi óte tómen. Biraq allergııa ózinen-ózi joıylmaıdy. Jalpy allergııanyń belgileri bir kúnde paıda bolýy múmkin. Biraq oǵan bizdiń aǵzamyz birte-birte keledi. Jáne ishek mıkroflorasy saý adamda allergııa bolǵanyn kórgen joqpyn. Mysaly, nájis analızi taldaýyn qarasaq, as qorytý júıesi saý adamdar tym az, - deıdi Arman Baıdildaev.

Al maýsymdyq allergııadan tolyqtaı aıyǵýǵa bolady. Tek ony arnaıy ýaqytta emdeý kerek.

– Maýsymdyq allergııaǵa keler bolsaq, keıbir adamdarda allergııanyń sımptomdary turaqty túrde bolyp turady. Jyl saıyn ózgermeıdi. Sol bir iship jatqan tabletkalaryn qabyldap, allergııasyn basady. Al basqa adamdarda jyl saıyn allergııanyń belgileri birte-birte kúsheıe beredi. Birinshi jyldary murny qyshyp, bitelip, ekinshi jyly kózdiń, mańdaıdyń qyshynýy qosylyp, birte-birte astmaǵa deıin alyp kelýi múmkin. Jáne maýsymdyq allergııadan tolyǵymen emdelýge bolady. Ol úshin biz qys mezgilinde arnaıy ımmýnologııalyq em ótkizemiz. Anyqtalǵan ósimdiktiń tozańynan jasalǵan dárilik zatty az mólsherde tildiń astyna berip turamyz. Solaı ımmýnıtet qalyptastyrý úshin adam aǵzasyna engizemiz. Qazir allergııa maýsymy bastalyp ketti. Endi qar túskenshe sımptomatıkalyq emnen basqa eshqandaı em qabyldaýǵa bolmaıdy. Sımptomatıkalyq em degenimiz – ol allergııanyń belgilerin basatyn, biraq allergııanyń ózin emdemeıtin em túri. Kóbine bizdiń halqymyz óz densaýlyǵyna nemquraıly qaraıdy. Qys, kúz mezgilderinde kelip, dárigerge qaralmaıdy. Tek qana allergııa maýsymy bastalyp, aýrýy mazalaǵanda ǵana esterine túsip, antıgıstamındik preparattar men gormondardy qoldanyp júredi, - deıdi stýdııa qonaǵy.

Maman maýsymdyq allergııadan qalaı qorǵaný kerektigin túsindirdi.

– Eger siz maýsymdyq allergııaǵa shaldyqqan bolsańyz, onda uzyn jeń, uzyn etek nemese uzyn balaq shalbar kıip, bas kıim ne oramal taǵyp, tozańnyń jınalýyna jol bermeý kerek. Jáne daladan úıge kirgen saıyn dýsh qabyldaý kerek. Eger siz dýsh qabyldamaı, tozańmen jatsańyz, ol tozań sizdiń terińiz arqyly deneńizge enedi. Adam maýsymdyq allergııadan tolyqtaı emdelip ketýi úshin keminde 3 qystan 8 qysqa deıin em alý kerek. Biraq birinshi kýrstan keıin allergııanyń belgileri áldeqaıda tómen bolýy múmkin. Em sharalarynyń nátıjesi birden kórinedi, - deıdi ol.

Keı allergııalar múlde jazylmaıdy. Ondaı kezde sizge allergııa beretin ónimderden ómir boıy qorǵanýǵa týra keledi.

– Taǵamdyq zattarǵa allergııa emdelmeıdi. Oǵan qarsy jalǵyz em bar – ol dıeta. Anyqtalǵan allergııa týdyrýshy taǵamdy tolyǵymen doǵarasyz. Árıne, eksperımentaldy ártúrli em túrleri bar, - deıdi maman.

Al maýsymdyq allergııanyń joıylýyna jer aýystyrý áser etpeıdi eken. Dáriger kópshilik arasynda jıi aıtylatyn «allergııadan qutylý úshin basqa jaqqa kóshý kerek» degen áńgimege túsinikteme berdi.

– Eger sizderde maýsymdyq allergııa bolsa, jer aýystyrý allergııanyń týmaýyna yqpal etýi múmkin. Biraq 100% kepildikpen allergııa týmaýy úshin eshqandaı ósimdik óspeıtin shóldi jerge nemese Antarktıdaǵa kóshý kerek. Basqa eshqandaı nusqa joq. Mysaly, bizde jýsannyń maýsymy shilde aıynyń aıaǵynda bastalsa, Túrkııaǵa kóship ketken otandastarymyz «Túrkııada jýsanǵa allergııa bolmaıdy» deýi múmkin. Biraq ol jaqta jýsannyń tozańdanýy maýsym aıynda bastalady eken. Eýrazııa kontınentinde ósimdikter bir-birine uqsas qoı. Biraq gúldený, tozańdaný maýsymy ártúrli ýaqytta júredi, - deıdi allergolog.

Keıde adamdar parazıtten paıda bolatyn qyshyný belgilerin allergııamen shatastyryp jatady. Al denemizdegi belgiler naqty neden paıda bolǵanyn qalaı anyqtaımyz?

– Adam ózindegi naqty bir zatqa reaktsııany ańǵarady. Osyndaı zatty jesem nemese myna jerge barsam, osyndaı reaktsııa paıda bolady deıdi. Al parazıti bar adamda qyshyný syndy reaktsııalar kez kelgen ýaqytta paıda bola beredi. Mysaly, lıamblıoz degen aýrý kezinde kóbinese keshke jaqyn allergııanyń belgileri kúsheıýi múmkin. Esekjem, tynystyń tarylýy, syryl, murynnyń bitelýi – onyń barlyǵy keshke jaqyn paıda bolady. Óıtkeni keshke jaqyn parazıtter oıanady. Sosyn tátti jegen saıyn belgi beredi. Jáne keıbir balalar men eresekter sóılegen kezde tamaǵynda shyrysh jınalady. Tátti jegen saıyn tamaqtary jybyrlaıdy. Adam jótelgen kezde loqsıdy, - deıdi dáriger.

Aıta keteıik, Qazaqstandaǵy maýsymdyq allergııa 5 jyl ishinde on ese artqan.