Maýsymda poıyzben 1,2 mıllıonnan astam qazaqstandyq saparǵa shyqty

ASTANA. KAZINFORM – 2025 jyldyń maýsym aıynda elimiz boıynsha «Jolaýshylar tasymaly» AQ-nyń 112 túrli baǵyttaǵy poıyzdarymen 1,2 mıllıonnan astam jolaýshy tasymaldandy.

- Dástúrli túrde jaz mezgilinde týrıstik baǵyttarǵa suranys artady. Máselen, maýsym aıynda Býrabaı kýrorty baǵyty boıynsha qatynaıtyn elektr poıyzdaryn 18,7 myńnan astam jolaýshy paıdalansa, Shyǵys Qazaqstandaǵy tanymal demalys orny – Alakól kóline poıyz arqyly 12,8 myńnan astam adam jetken, - dep jazdy Samuryq-Qazyna qorynan.

Kompanııa málimetinshe, jolaýshylar legin tıimdi uıymdastyrý maqsatynda jazǵy maýsymda suranysy joǵary baǵyttarǵa qosymsha poıyzdar shyǵaryldy. Atap aıtqanda, qosymsha reıster Alakól, Balqash jáne Býrabaı baǵyttarynda uıymdastyryldy.

Aıta keteıik, Aqtóbe – Astana baǵytyna jazǵy maýsymdyq poıyz qatynaıdy.