Maýsym bastalǵanyna qaramastan Jasybaı kóli jaǵasyndaǵy qurylys jumystary áli júrip jatyr
PAVLODAR. KAZINFORM - 10 maýsymnan Baıanaýyldaǵy Jasybaı demalys aımaǵynda týrıstik maýsym bastalyp ketti. Alaıda kommýnaldyq jaǵajaıda áli kúnge qurylys jumystary júrgizilip jatyr.
Oblys ákimdiginiń dereginshe, osy aıdyń sońyna deıin jaǵajaıda 65 kúnqaǵar qalqa, 3 úlken kóleńkeli shatyr, 400-den astam jatyn oryndyq, 3 qutqarý munarasy ornatylady. Kespetas pen terrasalyq taqtaıdan jaıaý júrginshiler joldary tóselip, dýsh kabınalary, sanıtarlyq toraptar jáne kıim aýystyratyn oryndar paıdalanýǵa beriledi.
- Jumys kólemi óte aýqymdy bolǵandyqtan, demalýshylardan ýaqytsha qolaısyzdyqtar úshin túsinistik tanytýdy suraımyz. Bul ózgeristerdiń nátıjesi kútken úmitti aqtap, uzaq jyldar boıy halyq ıgiligine qyzmet etedi dep senemin, - dep málimdedi óńir basshysy Asaıyn Baıhanov.
Jobany tolyq aıaqtaý shilde aıynyń ortasyna kózdelgen. Osy kezeńge deıin medpýnkt, polıtsııa men qutqarýshylar beketteri, fýtbol jáne voleıbol alańdary, sondaı-aq oıyn aımaǵy jabdyqtalady.
Osyndaı keshendi jumystar 2025 jyly Sabyndykól jaǵalaýynda da júrgizilgen. Búginde bul nysandar týrıster tarapynan joǵary suranysqa ıe.
Buǵan deıin Jasybaı demalys aımaǵyna kirý qansha turatynyn jazǵan bolatynbyz.
Sondaı-aq Toraıǵyr kóli mańynda bıyl da qaraqurt shyǵyp jatqanyn habarlaǵan edik.
