Maýsym aıynda Almaty — Maskat baǵyty boıynsha qatynaıtyn áýe reısteri qaıta iske qosylady

ASTANA. KAZINFORM – Bul týraly kólik mınıstri Marat Qarabaev pen Oman Sultandyǵynyń qarjy mınıstri Sultan Ál-Habsı arasynda ótken ekijaqty kezdesý aıasynda málim boldy. 

Kólik mınıstrliginiń málimetinshe kezdesý barysynda kólik sektoryndaǵy yntymaqtastyqtyń basym baǵyttary talqylandy. Ásirese Omannyń Sýhar, Salala jáne Dýkm porttary erekshe nazarǵa alynyp, osy porttar aıasynda yntymaqtastyq ornatý múmkindigi atap ótildi. Sultan Ál-Habsı Qazaqstanmen «Soltústik — Ońtústik» kólik dálizi boıynsha yntymaqtastyqty keńeıtýge daıyn ekenin bildirdi.

Sonymen qatar taraptar Qazaqstan men Oman Sultandyǵy arasynda áýe qatynasyn qaıta jańǵyrtý bastamalaryn talqylady. Maýsym aıynda omandyq SalamAir áýe kompanııasy Almaty — Maskat baǵyty boıynsha reısterdi qaıta bastaıdy.

Taraptar kólik jáne logıstıka salalaryndaǵy ózara tıimdi yntymaqtastyqty odan ári jalǵastyrýǵa nıetti.

Aıta ketelik Astana — Mılan tikeleı reısi ashylatyny týraly jazǵan edik.