Máýlit merekesiniń toılanyp jatqanyna myń jyldan asty - Qazaqstan musylmandary dinı basqarmasynyń tóraǵasy
ALMATY. Naýryzdyń 13-i. QazAqparat /Erlik Erjanuly/ - Máýlit merekesi musylmandary 70 paıyzdy quraıtyn Qazaqstanda ǵana emes, 10 paıyzdy quraıtyn elderde de toılanady. Bul búgin Almatyda ótken Máýlit merekesi kezinde aıtyldy,
dep habarlaıdy QazAqparat.
«Máýlit merekesiniń toılanyp kele jatqanyna myń jyldan asty. Máýlit jyry meshitterden bastalady. Sáken Ǵylmanı atamyzdyń muraǵattardan qazaq tilinde jazǵan máýlitin taýyp aldym. Máýlit merekesin toılaý qazaq jerinde de este joq sonaý eski zamandardan bastalady. Biraq ol keıin belgili sebeptermen úzilip qaldy. Qazir biz ony jalǵastyryp jatyrmyz. Biraq ol arab tilindegi túpnusqasy boıynsha oqylady. Múmkin birte-birte jaılap-jaılap ana tilimizde de ótkize bastaıtyn shyǵarmyz dep otyrmyz», deıdi Bas múftı Ábsatar qajy Derbisáli. Qazaqstan musylmandy dinı basqarmasy tóraǵasynyń aıtýynsha, musylmandary 13 paıyzdy quraıtyn Sıngapýrdiń musylman qaýymy Máýlit merekesin bir aı boıy toılaıdy. Al Ál-Farabı babamyzdyń zıraty jatqan Sırııa elinde ol 3 aı boıy toılanady. Olar máýlit aı bastalmaı turyp bir aı jáne Máýlit aıy bitken soń da taǵy bir aı qosyp 3 aı boıy merekeleıdi.
«Búgingi tańda Qazaqstanda 26 ulttan turatyn musylmandar bar eken. Qazaqstan - birlik eli, yntymaq eli. Biz bir nıettegi bir joldaǵy, bir maqsattaǵy elmiz. Qazaqstan keleshegi zor memleket», deıdi sheıh Ábsattar qajy Derbisáli.
