Máýlen Áshimbaev Vatıkanda Rım papasymen kezdesedi

ASTANA. KAZINFORM – Senat tóraǵasy Máýlen Áshimbaev Vatıkanǵa jumys saparymen baryp, Rım kýrııasynyń ókilderimen kezdesedi. Bul týraly QR Syrtqy ister mınıstrliginiń resmı ókili Aıbek Smadııarov aptalyq brıfıngide aıtty. 

Sapar 10 jeltoqsanda ótedi. Іssapar aıasynda Palata spıkeri Rım papasy Leo XIV qabyldaýynda bolady jáne konfessııaaralyq dıalog taqyrybyndaǵy dóńgelek ústelge qatysady.

Sonymen birge, Máýlen Áshimbaev Dinaralyq dıalog jónindegi dıkasterııa prefektisi Djordj Djeıkob Kývakarmen júzdesip, Papa Frantsısktyń qabirine gúl qoıady. Budan bólek, baǵdarlamada Malta ordeniniń Uly magıstri Fra Djon Danloppen ekijaqty qatynastar tarıhyndaǵy alǵashqy kezdesý josparlanǵan. 

– Sapar qorytyndysy boıynsha Malta ordenimen gýmanıtarlyq yntymaqtastyqty odan ári nyǵaıtýǵa baǵyttalǵan birqatar qujatqa qol qoıý kózdelgen, – dedi SІM resmı ókili.

2 jeltoqsanda Rım Papasy Lev XIV-tiń alǵashqy elshilik sapary aıaqtalǵanyn jazǵan edik.