Máýlen Áshimbaev Úndistannyń saılaý jónindegi komıssarymen kezdesti
ASTANA. KAZINFORM - Parlament Senatynyń tóraǵasy Máýlen Áshimbaev Úndistan Respýblıkasynyń Saılaý jónindegi bas komıssary Radjıv Kýmarmen kezdesti.
Máýlen Áshimbaev óz sózinde Radjıv Kýmardy Úndistanda jalpy saılaýdyń ótkizilýimen quttyqtap, atalǵan memleket Qazaqstannyń Azııadaǵy mańyzdy seriktesi ekenin aıtty. Sońǵy jyldarda yntymaqtastyqtyń barlyq negizgi baǵyttary boıynsha mańyzdy ýaǵdalastyqtarǵa qol jetkizildi. Halyqaralyq uıymdar aıasynda da parlamentaralyq qarym-qatynasty damytý máselesine basa mán berilip keledi.
«Qazaqstan Úndistanmen ekonomıkalyq yntymaqtastyqty, mádenıetaralyq dıalogty, týrızmdi jáne eki tarap ta múddeli basqa salalardy damytýdy, sondaı-aq, aýqymdy máseleler boıynsha ózara qarym-qatynasty odan ári tereńdetýdi kózdeıdi. Biz parlamentaralyq baılanystardy da nyǵaıtýǵa múddelimiz. Osyǵan baılanysty eki eldiń Parlamentterinde jumys isteıtin jáne ózara qarym-qatynasymyzdyń negizgi tetikteriniń biri sanalatyn Dostyq toptarynyń áleýetin tıimdi paıdalanýdyń mańyzy zor», – dedi Senat tóraǵasy.
Kezdesý barysynda Máýlen Áshimbaev Memleket basshysynyń bastamasymen elimizde iske asyrylyp jatqan reformalarǵa, onyń ishinde Qazaqstan Konstıtýtsııasyna engizilgen mańyzdy túzetýlerge de toqtalyp ótti. Senat Spıkeri zańnamalyq ózgerister bılikti ortalyqsyzdandyrý, saıası júıeniń tejemeligi men tepe-teńdigin kúsheıtý jáne saıası partııalar arasyndaǵy básekelestikti arttyrý baǵytynda júrgizilgenin tilge tıek etti.
Óz kezeginde Radjıv Kýmar Qazaqstandaǵy áleýmettik-ekonomıkalyq jáne saıası ózgeristerdi, atap aıtqanda, azamattardyń quqyqtary men múddelerin qorǵaýǵa arnalǵan bastamalardy joǵary baǵalady. Sondaı-aq eki el arasyndaǵy parlamentaralyq yntymaqtastyqty odan ári nyǵaıtýǵa múddeli ekenin jetkizdi.
Senat tóraǵasy Úndistannyń din qaıratkerleri Álemdik jáne dástúrli dinder kóshbasshylarynyń Sezine belsendi qatysyp kele jatqany úshin alǵys bildirip, Qazaqstan rýhanı dıplomatııany damytýǵa basa mán berip otyrǵanyn aıtty. Suhbat kezinde Sezd Hatshylyǵynyń qyzmeti men jumys jospary týraly da sóz boldy.
